18.03.2026 | 14:13
Միքայել արքեպիսկոպոս Աջապահյանն այցելել է «Իզմիրլյան» ԲԿ
Աբխազիան կցանկանար միանալ ՌԴ-ի և Բելառուսի Միութենական պետությանը. Բժանիա
Քաղաքականություն
21.02.2024 | 23:16
Աբխազիայի նախագահ Ասլան Բժանիան հայտարարել է, որ իր երկիրը հանդես է գալիս Ռուսաստանի և Բելառուսի հետ Միութենական պետության ձևաչափով ինտեգրմանը։ Նա նշել է, որ Աբխազիայի համար կարևոր է պահպանել իր անկախությունը։ Ինտեգրումը, նրա խոսքով, կարող է տևել 5-10 տարի, գրում է Կոմերսանտը։
«Մենք ցանկանում ենք միասին լինել Ռուսաստանի, Բելառուսի հետ, ցանկանում ենք ակտիվ մասնակիցներ լինել այս ինտեգրացիոն գործընթացին՝ պահպանելով մեր անկախությունը։ Իսկ Միութենական պետությունը ձևաչափ է, որտեղ անկախ պետությունները փոխշահավետ պայմաններ են համաձայնեցնում վերազգային կառույցների ստեղծման շուրջ»,- ՏԱՍՍ-ին տված հարցազրույցում ասել է Բժանիան։
Աբխազիայի նախագահը նշել է, որ ինտեգրման ընթացքում առաջնորդվում է ՌԴ-ի հետ դաշինքի և ռազմավարական գործընկերության մասին միջպետական համաձայնագրով, որը ստորագրվել է 2014 թվականի նոյեմբերին։
«Եվ այնտեղ հստակ ասվում է, որ Ռուսաստանն աջակցում է Աբխազիայի Հանրապետությանը՝ մասնակցելու Ռուսաստանի Դաշնության նախաձեռնած ինտեգրացիոն գործընթացներին։ Այս ձևաչափն առավելագույնս համապատասխանում է մեր ապագային, ապագայի մեր տեսլականին»,- հավելել է նա։
Հավելենք, որ Աբխազիան ճանաչված չէ միջազգային հանրության կողմից։ Իրավաբանորեն Բելառուսը ևս չի ճանաչել Աբխազիայի անկախությունը, սակայն Ալեքսանդր Լուկաշենկոն Բժանիայի հետ հանդիպել է Պիցունդայում 2022 թվականին։ 2023 թվականին Լուկաշենկոն Բժանիային ընդունել է Մինսկում։
