24.06.2026 | 13:53
3 արծաթե և 1 բրոնզե մեդալ աշխարհագրության միջազգային 2-րդ բաց օլիմպիադայից
Պուտինը Կիմ Չեն Ընին լիմուզին է նվիրել՝ խախտելով ՄԱԿ-ի պատժամիջոցները
Քաղաքականություն
20.02.2024 | 21:17
Ռուսաստանի նախագահ Վլադիմիր Պուտինը Հյուսիսային Կորեայի առաջնորդ Կիմ Չեն Ընին ծննդյան օրվա կապակցությամբ ռուսական լիմուզին է նվիրել՝ դրանով իսկ խախտելով ՄԱԿ-ի Անվտանգության խորհրդի կողմից Փհենյանի դեմ Հյուսիսային Կորեայի միջուկային ծրագրի պատճառով սահմանված պատժամիջոցները, գրում է Bloomberg-ը։
Հայտնի է, որ Անվտանգության խորհրդի պատժամիջոցներն արգելում են, մասնավորապես, շքեղ ապրանքների, այդ թվում՝ շքեղ մեքենաների ներմուծումը Հյուսիսային Կորեա։
Ավելի վաղ Հյուսիսային Կորեայի պետական KCNA լրատվական գործակալությունը հայտնել էր, որ փետրվարի 18-ին Պուտինը Կիմ Չեն Ընին «անձնական ռուսական արտադրության մեքենա է նվիրել»։
ՌԴ նախագահի խոսնակ Դմիտրի Պեսկովը պարզաբանել է, որ խոսքը Aurus մեքենայի մասին է։ Պեսկովը չի նշել դրա մոդելը, սակայն, ըստ ռուսական լրատվամիջոցների, ամենայն հավանականությամբ, դա Aurus Senat լիմուզինն է, որը վարում է ինքը՝ Պուտինը։
Սա հենց այն մեքենան է, որը ՌԴ նախագահը ցույց է տվել Կիմին 2023 թվականի սեպտեմբերին, երբ նա այցով գտնվում էր Ռուսաստանում։ Ռուսական աղբյուրների համաձայն՝ Aurus Senat-ի գինը սկսվում է 41 մլն ռուբլուց (մոտ 440 հազար դոլար): Մեկնաբանելով ՌԴ նախագահի նվերը՝ նրա խոսնակ Դմիտրի Պեսկովն ասել է, որ Պուտինը մեքենան նվիրվել է Հյուսիսային Կորեայի ղեկավարին, քանի որ այն դուր էր եկել նրան։
Հայտնի է, որ հունվարի 8-ին Կիմ Չեն Ընը դարձավ 40 տարեկան։
