07.10.2026 | 10:15
Հայաստանի ներկայացուցիչները ադրբեջանցի և միջազգային փորձագետների հետ Լոնդոնում մասնակցել են աշխատաժողովի
Թուրքիայի տրանսպորտի նախարարը՝ Ադրբեջանը Նախիջևանին կապող ճանապարհների մասին
Քաղաքականություն
19.02.2024 | 15:44
Թուրքիայի տրանսպորտի և ենթակառուցվածների նախարար Աբդուլքադիր Ուրալօղլուն Hurriyet-ի հետ զրույցում անդրադարձել է նաև տարածաշրջանում հաղորդակցությունների ապաշրջափակման գործընթացի մասին։
«Հայաստանի տարածքով անցնող այդ երթուղու ուղղությամբ աշխատանքներ են տարվում։ Այն 43 կմ է։ Եթե հայկական կողմում խնդիր լինի, Ադրբեջանը կապեր ունի նաև Իրանի հետ՝ կապված իրանական տարածքով միջանցքի հնարավորության հետ։ Հետևաբար, կա երկու այլընտրանք, և երկուսն էլ հենց հիմա սեղանին են»,- ասել է Ուրալօղլուն։
Նա նշել է, որ ադրբեջանական կողմը շարունակում է շինաշխատանքները։
«Նախիջևանի և մեր կողմի տենդերն արվել է։ Կվերականգնվի կամ կվերակառուցվի 106 կմ երկարությամբ ճանապարհ»,- նշել է թուրք նախարարը։
Նա նաև խոսել է Անկարայի կողմից նոր առաջարկվող «Զարգացման ճանապարհ» նախագծի մասին, որը ձգվելու է Պեկինից Լոնդոն։
«Երբ Չինաստանից նավը ժամանի Պարսից ծոց, նա իր բեռները կթողնի Իրաքի Ալ-Ֆավ նավահանգստում։ Այնտեղից այն 1200 կիլոմետր երկարությամբ երկաթուղով և մայրուղով կհասնի Թուրքիայի Օվաքոյ դարպաս, որտեղից կնավարկի դեպի Եվրոպա՝ կա՛մ երկաթուղով, կա՛մ ցամաքային ուղիով, կա՛մ, ըստ ցանկության, ծովով դեպի Միջերկրական ծով»,- ասել է Ուրալօղլուն։
Այս նախագծի իրականացման համար Թուրքիան ֆինանսավորում է փնտրում Ծոցի երկրներում։ Այսպիսով՝ Անկարան փորձում է այլընտրանք ստեղծել ԱՄՆ նախաձեռնությամբ ստեղծված Մերձավոր Արևելք-Հնդկաստան առևտրային միջանցքին, որտեղ բացակայում է Թուրքիան։
Միջանցքի վերաբերյալ փոխըմբռնման հուշագիրը ստորագրել էին ԵՄ-ն, Հնդկաստանը, Սաուդյան Արաբիան, ԱՄԷ-ն, ԱՄՆ-ը և մյուս գործընկերները նախորդ տարի Հնդկաստանում տեղի ունեցած G20-ի գագաթնաժողովին։
Էմմա Չոբանյան
