Պաշտոնս ստանձնելու համար ինձ մեղադրելը դեգեներատիվ միջավայր ստեղծելու փորձ է. Լուսինե Ղարախանյան․ ՏԵՍԱՆՅՈՒԹ

«Մենք Թումանյանին խորապես չենք ճանաչում, որպես համամարդկային ֆենոմեն՝ նա մեզանում ըմբռնված չէ: Մենք Թումանյանին մեծ մասամբ գիտենք դասագրքերից, էքսկուրսիաներից, բայց պետք է նրան հանրությանը հրամցնել ավելի մեծ մասշտաբներով: Պետք է հանրահռչակել Թումանյանին նաև սփյուռքի մեր հայրենակիցների շրջանում»,- Factor TV-ի հետ զրույցում նման տեսակետ է հայտնում Հովհաննես Թումանյանի թանգարանի տնօրենի ժամանակավոր պաշտոնակատար Լուսինե Ղարախանյանը:

Այս տարի տոնում ենք բանաստեղծի 155-ամյակը: Ղարախանյանը ցանկություն է հայտնում, որ Թումանյանի բարությունն ու լավատեսությունը փոխանցվեր մեր հայրենակիցներին։

«Նա անգամ Պետերբուրգի բանտում վատը լավ է տեսել, Թումանյանն առողջ լավատես էր, ոչ թե ողջակեզ ու զոհ»,- ասում է մեր զրուցակիցը:

Նրա խոսքով՝ թանգարանը պետք է ընդառաջ գնա նոր տեխնոլոգիաներին և դրանք դարձնի գործիք` Թումանյանին հանրահռչակելու համար. «Պետք է ստեղծենք հեռախոսային հավելվածներ ու խաղեր՝ Թումանյանին ավելի ճանաչելի դարձնելու համար: Ի դեպ, մենք ստեղծել ենք հենց Թումանյանի հեղինակած խաղերը, թանգարանը վաճառում է դրանք»:

Ի դեպ, Հովհ. Թումանյանի թանգարանում վերանորոգման աշխատանքներ են ընթանում: Լուսինե Ղարախանյանը տեղեկացնում է, որ դրանք կավարտվեն 2026-ի առաջին եռամսյակում։

«Ունենալու ենք ժամանակակից, նորարարական պահանջներին համապատասխան հետաքրքիր կառույց, որը հավակնելու է դառնալ գիտակրթական, մշակութային կենտրոն, գիտահետազոտական ինստիտուտ»,- նշում է նա:

Ի դեպ, Արցախում ԿԳՄՍ նախարար աշխատած Լուսինե Ղարախանյանի նշանակումը թանգարանի տնօրենի ԺՊ-ի պաշտոնում միանշանակ չընդունվեց հանրության կողմից, քանի որ դա տեղի ունեցավ ԿԳՄՍ նախարարության կողմից արդեն նախկին տնօրեն Անի Եղիազարյանին աշխատանքից ազատելու և այդ առթիվ բարձրացած բողոքի ալիքի ֆոնին: Շատերը, այդ թվում՝ արցախցիներ, Ղարախանյանին մեղադրեցին ներկայիս իշխանության ձեռքից պաշտոն վերցնելու համար։

«Մարդիկ «փոքրանում են». դա օրինաչափ երևույթ է, այն աստիճան են իջնում, որ քաղաքականացնում են պաշտոններ, որոնք քաղաքականության հետ կապ չունեն: Հայաստանի էլիտար դաշտը չի մերժել ինձ, դեմ չի եղել իմ նշանակմանը: Ես կապ չունեմ նախկին տնօրենին պաշտոնից ազատելու հետ, ինձ այս պաշտոնն առաջարկվել է նրա ազատումից 1 ու կես ամիս անց: Այնպես որ՝ ինձ մեղադրելը իշխանության վրա հարձակվելու հերթական պատրվակն էր»,- մեկնաբանում է Ղարախանյանը:

Ինչ վերաբերում է արցախցիների քննադատություններին, նա նկատում է՝ այդ նույն արցախցիներն աշխատում են, օրինակ, հայաստանյան դպրոցներում և կառավարությունից աշխատավարձ են ստանում. «Իմ դեմ այդ խոսակցությունները շրջանառելը դեգեներատիվ միջավայր ստեղծելու փորձեր են, նեղ անձնական խնդիրները բերում են հանրային տարածք»:

Մանրամասները՝ տեսանյութում:

Աննա Բաբաջանյան