Դատարանը քննում է Արշակ արքեպիսկոպոս Խաչատրյանին կալանավորելու միջնորդությունը. ՈՒՂԻՂ

Երևանի քրեական դատարանի Ավան և Նոր Նորք նստավայրում սկսվել է Մայր աթոռի դիվանապետ Արշակ արքեպիսկոպոս Խաչատրյանին կալանավորելու միջնորդության քննությունը:

Նիստը դռնփակ է, այն քննում է դատավոր Մասիս Մելքոնյանը:

Արշակ արքեպիսկոպոս Խաչատրյանին մեղադրում են իրացնելու նպատակով թմրանյութերի ապօրինի շրջանառության մեջ:

Հոգևորականի փաստաբան Արսեն Բաբայանը երեկ որոշ մանրամասներ է հայտնել մեղադրանքից, ըստ որի՝ արքեպիսկոպոսին վերագրվող դեպքը տեղի էր ունեցել 2018 թվականին Ամենայն հայոց կաթողիկոս Գարեգին Բ-ի դեմ բողոքի ակցիայի ժամանակ: Ըստ մեղադրանքի՝ ակցիայի մասնակիցներից մեկին վարկաբեկելու նպատակով Արշակ արքեպիսկոպոսը ինչ-որ մեկին հրահանգել է թմրանյութ գցել նրա ուսապարկը:

Երեկ Բաբայանը բարձրաձայնել է այն մասին, որ եթե անգամ հոգևորականը նման արարք կատարած լիներ, նրան չէր կարող դրա համար վերագրվել իրացնելու նպատակով թմրամիջոցների ապօրինի շրջանառության մեղադրանք, քանի որ հոդվածի վերնագիրն արդեն իսկ վկայում է այն մասին, որ ենթադրյալ արարքի նպատակը ոչ թե թմրամիջոց իրացնելն է, այլ անձին վարկաբեկելը:

Նշենք, որ Արշակ արքեպիսկոպոս Խաչատրյանին երեկ Քննչական կոմիտե էին հրավիրել հարցաքննության նրան վերագրվող տեսանյութի գործով, սակայն հարցաքննության ավարտից հետո, երբ արդեն փաստաբանի հետ ցանկացել են դուրս գալ շենքից, նրանց դիմավորել են ԱԱԾ աշխատակիցներն ու հայտնել, որ քննիչի որոշում ունեն՝ հոգևորականին ձերբակալելու վերաբերյալ:

Նա այս ռեժիմով ձերբակալված մնալ կարող է առավելագույնը 24 ժամ, ուստի դատավորը այսօր երեկոյան արդեն պետք է որոշում կայացնի կալանքի միջնորդության վերաբերյալ, իսկ որոշումը կայացրած չլինելու դեպքում 24 ժամը լրանալուց հետո հոգևորականը պետք է ազատ արձակվի:

Արշակ արքեպիսկոպոս Խաչատրյանին կալանավորելու միջնորդությունը մակագրվել է Երևանի քրեական դատարանի դատավոր Մասիս Մելքոնյանին: Այս մասին Factor TV-ին հայտնում են դատարանից:

Արքեպիսկոպոսը մեղադրվում է Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական համաձայնությամբ թմրամիջոց ապօրինի իրացնելը):

Արաքս Մամուլյան