ԱՀԿ-ն կորցրել է կապը Գազայի հարավի «Նասեր» հիվանդանոցի անձնակազմի հետ

Առողջապահության համաշխարհային կազմակերպությունը (ԱՀԿ) կորցրել է կապը Խան Յունիսում շրջապատված «Նասեր» հիվանդանոցի բժշկական անձնակազմի հետ, մարդասիրական մուտքն այնտեղ  արգելափակված է։ Այս մասին հայտնել է ԱՀԿ ղեկավար Թեդրոս Ադհանոմ Գեբրեյեսուսը X-ի իր միկրոբլոգում:

«Քաղաքացիական անձինք են սպանվել, ապաստան հայցողներին հրամայվել է տարհանվել, հյուսիսային պատը քանդվել է։ Ինձ անհանգստացնում է այն, ինչ կատարվում է Գազայի «Նասեր» բժշկական համալիրում մոտ մեկ շաբաթ շրջափակված լինելուց հետո: Հաղորդվում է, որ մարտերի արդյունքում ոչնչացվել են բժշկական սարքավորումների ու պարագաների պահեստներ։ Հոսպիտալ մուտքը դժվար է, կարիքավորների համար ապահով միջանցք չկա։ Վերջին չորս օրվա ընթացքում ԱՀԿ-ի երկու առաքելության մուտքը մերժվել է, և մենք կորցրել ենք կապը հիվանդանոցի անձնակազմի հետ»,- ասվում է գրառման մեջ։

ԱՀԿ-ի ղեկավարը հավելել է, որ «Նասեր» հիվանդանոցը Գազայի հատվածի հարավի առողջապահական համակարգի ողնաշարն է, հետևաբար, պետք է պաշտպանված լինի և թույլատրվի մարդասիրական մուտքը:

Ավելի վաղ Պաղեստինի առողջապահության նախարարությունը հայտնել էր, որ իսրայելական զորքերը խստացրել են «Նասեր» բժշկական համալիրի շրջակա տարածքի շրջափակումն ու գնդակոծությունը՝ հավելելով, որ նման գործողություններով Իսրայելի պաշտպանության բանակը վտանգում է 300 բուժանձնակազմի և 450 հիվանդ ու վիրավոր մարդկանց կյանքը, ինչպես նաև հիվանդանոցի տարածքում գտնվող, ինչպես նաև մոտակա դպրոցում ապաստանած 10 հազար փախստականներին։