11.07.2026 | 00:59
ԱԱ-2026․ Իսպանիան հաղթեց և կիսաեզրափակիչում կմրցի Ֆրանսիայի հետ․ ՏԵՍԱՆՅՈՒԹ
Ում տարածքում է եղել ռազմական բախումը․ 4 կամավորականի կյանք խլած սադրանքի մանրամասները. ՏԵՍԱՆՅՈՒԹ
Քաղաքականություն
13.02.2024 | 21:02
4 զոհ և մեկ վիրավոր․ այսօր լուսադեմին ադրբեջանական հերթական սադրանքի հետևանքն է։ Ըստ Պաշտպանության նախարարության հաղորդագրության՝ ժամը 05:30-ից սկսած Ադրբեջանի ԶՈՒ ստորաբաժանումները հրաձգային զենքերից կրակ են բացել Ներքին Հանդի հատվածում տեղակայված հայկական դիրքերի ուղղությամբ։ Միջադեպը տևել է մոտ 4 ժամ։
Պաշտպանության նախարարությունը նախ հայտնեց 2 զոհի մասին, ժամեր անց՝ ևս 2-ի։ Հրապարակվեցին նաև նրանց անունները՝ 42-ամյա Գագիկ Մանուկյան, 45-ամյա Արսեն Համբարձումյան, 50-ամյա Էդուարդ Հարությունյան, և ամենատարեցը՝ 67-ամյա Հրաչյա Հովհաննիսյան։
Երկրապահ կամավորակաների միությունը հայտնեց, որ բոլորը ԵԿՄ կամավորներ են եղել, իսկ վիրավորը 34-ամյա Ռուստամ Վարդանյանն է։ Նրա վիճակը գնահատվում է միջին ծանրության, կյանքին վտանգ չի սպառնում։
ԱԺ պաշտպանության և անվտանգային հարցերով հանձնաժողովի նախագահ Անդրանիկ Քոչարյանն առավոտյան հայտնեց, որ դիերի մի մասը դուրս է բերվել, ինչը հարց էր առաջացրել՝ ո՞ւմ վերահսկողության տակ գտնվող տարածքում է տեղի ունեցել բախումը։ Ավելի ուշ Քոչարյանը փորձեց պարզաբանել։
Սադրանքի համար հակառակորդը դեռ երեկվանից է հող նախապատրաստում։ Ադրբեջանական կողմը հայտարարել էր, թե Հայաստանի ԶՈՒ-ն կրակ է բացել Զանգիլանի շրջանի դիրքերի ուղղությամբ, ինչի հետևանքով պետական սահմանապահ ծառայության զինծառայող է վիրավորվել։ ՀՀ ՊՆ ռազմական ոստիկանությունն այսպես էր արձագանքել ադրբեջանական կողմին։
«Ադրբեջանական լրատվամիջոցների տարածած տեղեկատվությունը Հայաստան-Ադրբեջան պետական սահմանի Կապան-Զանգելան հատվածում ս/թ փետրվարի 12-ին հայաստանցի դիրքապահների կողմից կրակ բացելու մասին հետաքննվում է: Վերադաս հրամանատարության կողմից գրավոր հրամաններով հստակ սահմանված են այն դեպքերը, երբ զինծառայողը, իրադրությունը գնահատելով, կարող է եւ/կամ պարտավոր է կրակ բացելու որոշում կայացնել: Նախնական տեղեկատվությամբ՝ փետրվարի 12-ին տվյալ տեղամասում նման իրադրություն առկա չի եղել»,- նշվել էր ՊՆ հաղորդագրության մեջ։
Ներքին Հանդի ուղղությամբ սադրանքից հետո Բաքուն հայտարարեց, թե այսպես ասած ««Հատուցում» գործողություն է իրականացրել ի պատասխան փետրվարի 12-ին սահմանին տեղի ունեցածի։ Ադրբեջանի հարցերով փորձագետ Տաթևիկ Հայրապետյանի կարծիքով՝ Պաշտպանության նախարարության երեկ տարածած հաղորդագրությունը սադրանքը կանխելու փոխարեն հակառակ ազդեցությունն է ունեցել։
Պաշտպանական գերատեսչությունը երեկ նշել էր, որ եթե քննության արդյունքում հաստատվի, որ հրամանը խախտվել է, ապա մեղավորները կենթարկվեն պատասխանատվության:
Մարդու իրավունքների նախկին պաշտպան, «Թաթոյան» հիմնադրամի տնօրեն Արման Թաթոյանն ասում է՝ վրդովված է Պաշտպանության նախարարության տարածած հաղորդագրությունից։ Ըստ նրա՝ եթե հայկական կողմը գրում է՝ քննություն է իրականացնում, նշանակում է՝ ընդունում է, որ ադրբեջանական ուժերի ներկայությունն օրինական է, և դա օկուպացված տարածք չէ։
Չնայած ադրբեջանական կողմի սադրանքներին և ռազմատենչ հռետորաբանությանը՝ հայկական կողմը մշտապես խոսում է խաղաղության հասնելու ձգտումներից։ Արդյո՞ք նման սադրանքներով է ուղեկցվելու խաղաղության դարաշրջանը․ քաղաքագետ Անդրիաս Ղուկասյանը շեշտում է՝ Ադրբեջանը խաղաղություն չի ուզում, և դա ակնհայտ է։
Սահմանային էսկալացիաներ ծավալելու համար Ադրբեջանը փնտրում է պատրվակներ․ Բաքվի սադրանքին այսպես է արձագանքել է ՀՀ ԱԳՆ-ն՝ շեշտելով՝ ադրբեջանական ղեկավարությունը շարունակաբար փորձ է անում վիժեցնել Հարավային Կովկասի կայունությամբ և անվտանգությամբ շահագրգիռ դերակատարների ջանքերը՝ վերսկսելու Հայաստանի և Ադրբեջանի միջև հարաբերությունների կարգավորմանն ուղղված բանակցութունները: Ադրբեջանի ԱԳՆ-ն հայկական կողմի հայտարարությունը գնահատում է «բացարձակապես անհիմն»։
Մանրամասները՝ տեսանյութում։
Ռոզա Վարդանյան
