Մոսկվան ծանր զրահատեխնիկայի կորուստներին կարող է դիմակայել ևս երեք տարի. զեկույց

Ռուսաստանը կորցրել է ավելի քան 3000 տանկ Ուկրաինա իր լայնամասշտաբ ներխուժման ժամանակ, որը համարժեք է նրա նախապատերազմական ամբողջ կարողությանը։ Պահեստում, սակայն, ունի ավելի ցածր որակի զրահատեխնիկայի պաշարներ՝ գալիք տարիների կորուստները փոխհատուցելու համար։ BBC-ի ռուսական ծառայության փոխանցմամբ՝ նման հաշվարկներ է արել Լոնդոնի Ռազմավարական հետազոտությունների միջազգային ինստիտուտը։

Դրա համաձայն, Ուկրաինան նույնպես մեծ կորուստներ է կրել 2022 թվականի փետրվարին ռուսական ներխուժումից հետո, սակայն արևմտյան ռազմական տեխնիկայի մատակարարումները թույլ են տվել նրան պահպանել պաշարները՝ միաժամանակ բարելավելով որակը։

«Մոսկվան կարողացել է որակը փոխանակել քանակով՝ պահեստից հանելով հազարավոր հին տանկեր՝ երբեմն մինչև 90 մեքենա ամսական»,- ասվում է «Ռազմական հաշվեկշռի» ամենամյա զեկույցում:

Ռուսաստանի պաշարները նշանակում են, որ Մոսկվան «կարող է դիմակայել ևս երեք տարի ծանր կորուստներին և փոխարինել տանկերի կորուստը հին պաշարներից, թեև ավելի ցածր տեխնիկական մակարդակով, անկախ նոր սարքավորումներ արտադրելու իր կարողությունից»,- ասվում է զեկույցում։

Ըստ վերլուծաբանների՝ Ռուսաստանն ունի 1750 հիմնական մարտական տանկ՝ սկսած տասնամյակների վաղեմության T-55-ից մինչև ավելի ժամանակակից T-80 և T-90: Եվս 4000 տանկ պահվում է:

«Իրավիճակն ընդգծում է ռազմական փակուղու աճող զգացումը, որը կարող է պահպանվել 2024 թվականի ընթացքում»,- ասվում է զեկույցում: