Քաղաքականություն
13.02.2024 | 22:12
Ադրբեջանի Ներքին գործերի նախարարության (ՆԳՆ) հատուկ վարչության գլխավոր հետախույզ, փոխգնդապետ Թառլան Աբբասզադեն ձերբակալվել է պետական դավաճանության մեղադրանքով։ Նրան մեղադրում են Իրանի հատուկ ծառայության հետ գաղտնի համագործակցության համար, գրում են ադրբեջանական լրատվամիջոցները։
Հաղորդվում է, թե Թառլան Աբբասզադեն, իբր, պարբերաբար հանդիպել է Իրանի հատուկ ծառայության աշխատակցի հետ և նրան փոխանցել մի շարք գաղտնի տեղեկություններ։ Նշվում է, որ այդ անձն աշխատում է Ադրբեջանում Իրանի դեսպանատանը։ Համագործակցության դիմաց ոստիկանության գնդապետը նրանից գումար է վերցրել։
1984 թվականին ծնված Թառլան Աբբասզադեն 2007-2022 թվականներին աշխատել է ՆԳՆ համակարգում՝ տարբեր պաշտոններում։ Նրան բերման են ենթարկել Պետական անվտանգության ծառայության աշխատակիցները։
Աբբասզադեն չի ընդունում Քրեական օրենսգրքի 274-րդ հոդվածով (դավաճանություն) իրեն առաջադրված մեղադրանքը։ Դատարանը, սակայն, նրան մեղավոր է ճանաչել և դատապարտել 17 տարվա ազատազրկման։
Ադրբեջանի իրավապահ մարմիններն այս դեպքի մասով պաշտոնական տեղեկություններ չեն հաղորդում։
Էմմա Չոբանյան
