Տնտեսություն
10.02.2024 | 17:48
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը հանդիպել է Ասիական զարգացման բանկի (ԱԶԲ) հայաստանյան գրասենյակի տնօրեն Դոն Լամբերտի գլխավորած պատվիրակությանը: Այս մասին տեղեկացնում են ՏԿԵ նախարարությունից։
«ԱԶԲ հայաստանյան գրասենյակի տնօրենը տեղեկացրել է, որ այցի նպատակն է քննարկել ջրամբարաշինության եւ ոռոգման համակարգերի, դպրոցաշինության, կոշտ կենցաղային թափոնների
կառավարման եւ Սեւանա լճի ջրի որակի բարելավմանն ուղղված ծրագրերին վերաբերող հարցեր:
Խոսելով ջրամբարաշինության ծրագրերի եւ հատկապես Կապսի ջրամաբարի ծրագրի մասին՝ Տերտերյանը կարեւորել է ԱԶԲ-ի ակտիվ եւ արդյունավետ համագործակցության հնարավորությունը ծրագրի մեջ ներգրավված միջազգային մյուս գործընկեր կառույցների հետ:
Զրուցակիցները կարեւորել են նաեւ ոռոգման համակարգերի կառուցման, վերակառուցման անհրաժեշտությունը։
Դպրոցաշինության ծրագրերին անդրադարձ կատարելով՝ ԱԶԲ-ի ներկայացուցիչները խոսել են իրենց մոտեցումների, առաջիկա ծրագրերի, կարեւորել կառուցվող դպրոցների ծախսարդյունավետ լինելը եւ կառուցումից հետո շինության հետագա պահմանման հարցերը:
Դպրոցաշինության մասով Տերտերյանը նշել է, որ գործընթացը ՀՀ կառավարության ռազմավարական առաջնահերթություններից է եւ առաջարկել է հետագա քննարկումններին ներգրավվել շահագրգիռ մյուս գերատեսչություններին նույնպես:
Սեւանա լճի ջրի որակի բարելավման վերաբերյալ բանկի ներկայացուցիչները նշել են, որ առկա է հնարավորություն երեք մեխանիկական մաքրման կայանները դարձնել կենսաբանական մաքրման կայաններ: Նախարարի տեղակալը կարեւորելով մաքրման կայանների առկայությունը՝ միաժանակ ընդգծել է այդ կայանների արդյունավետ, ճիշտ կառավարման եւ շահագործման անհրաժեշտությունը:
Խոսելով կոշտ կենցաղային թափոնների կառավարման մասին՝ Վաչե Տերտերյանը կարեւորել է կառավարման արդյունավետ մոդելների ուսումնասիրության եւ հիմնավորման կարեւորությունը։
Հանդիպման ընթացքում քննարկվել են երկուստեք կարեւորություն ունեցող այլ հարցեր եւս»,- ասված է հաղորդագրության մեջ:
