Քաղաքականություն
09.02.2024 | 22:50
Նորվեգիայի կառավարությունը խորհրդարանին առաջարկել է արտադրողից պատվիրել NASAMS հակաօդային պաշտպանության ավելի շատ համակարգեր, որոնց մի մասը նախատեսվում է փոխանցել Ուկրաինային։ Այս մասին հայտնել է Նորվեգիայի կառավարությունը, գրում է ուկրաինական «Европейская правда»-ն:
NASAMS (Norwegian Advanced Surface-to-Air Missile System) միջին հեռահարության շարժական զենիթահրթիռային համակարգը նախատեսված է ցանկացած եղանակային պայմաններում ցածր և միջին բարձրությունների վրա օդային թիրախներ գրավելու համար: Համալիրը մշակվել է նորվեգական Կոնգսբերգ ընկերությունների կողմից՝ ամերիկյան Raytheon Company System ընկերության հետ համատեղ։ Այդ համալիրներն արդեն ծառայում են ուկրաինական բանակին։
Պատվերի արժեքը գնահատվում է 3,45 մլրդ նորվեգական կրոն՝ ավելի քան 300 մլն եվրո։
«Նորվեգական NASAMS համակարգը փրկում է ուկրաինացիների կյանքը և կանխում շենքերի և ենթակառուցվածքների ոչնչացումը: Ռուսական հրթիռային և անօդաչու սարքերի հարձակումները լայնածավալ և դաժան են, ուստի ՀՕՊ-ը բացարձակապես կարևոր է Ուկրաինայի համար»,- Նորվեգիայի պաշտպանության նախարար Բյորն Արիլդ Գրամի խոսքերն է մեջբերում ուկրաինական պարբերականը։
Միաժամանակ, ըստ աղբյուրի, նախարարը մտահոգված է, որ Նորվեգիան հնարավորինս արագ ձեռք բերի հակաօդային պաշտպանության համակարգեր սեփական պաշտպանության համար։ Առայժմ հայտնի չէ, թե պատվիրված զենքի որ մասն է գնալու Ուկրաինա։
