ՄԱԿ-ը, Եգիպտոսը և ԱՄՆ-ը մտահոգված են Ռաֆահում ստեղծված իրավիճակով

ՄԱԿ-ի գլխավոր քարտուղարը մտահոգություն է հայտնել Ռաֆահում ՀԱՄԱՍ-ի դեմ հարձակումը շարունակելու՝ Իսրայելի ծրագրերի կապակցությամբ, որտեղ ապաստանել են 1,5 միլիոն պաղեստինցիներ, գրում է Euronews-ը:

«Գազայի բնակչության կեսն այժմ թակարդում է Ռաֆայում: Նրանք գնալու տեղ չունեն: Նրանք չունեն տուն և հույս չունեն»,- ասել է ՄԱԿ-ի գլխավոր քարտուղար Անտոնիո Գուտերեշը՝ «հատուկ մտահոգություն» հայտնելով այդ քաղաքում ստեղծված իրավիճակի վերաբերյալ:

Ավելի վաղ Իսրայելի վարչապետ Բենիամին Նեթանյահուն հայտարարել էր, որ հարձակումը կտարածվի մինչև Ռաֆահ, չնայած այն հանգամանքին, որ այդ գոտին նախկինում «անվտանգ» էր հայտարարվել։ Մոտավորապես 1,5 միլիոն մարդ ապաստանել է այնտեղ։

ՄԱԿ-ի Մարդու իրավունքների հարցերով գերագույն հանձնակատար Ֆոլքեր Թյուրքը հայտարարել է, որ հոկտեմբերից ի վեր Իսրայելի գործողությունները կարող են արդեն բավարար լինել դրանք որպես ռազմական հանցագործություն որակելու համար։

«Գույքի լայնածավալ ոչնչացումը, որը չի հիմնավորվում ռազմական անհրաժեշտությամբ և իրականացվել է անօրինական և դիտավորությամբ, հանդիսանում է Ժնևի չորրորդ կոնվենցիայի լուրջ խախտում և պատերազմական հանցագործություն: Իսրայելը հստակ պատճառներ չի ներկայացրել քաղաքացիական ենթակառուցվածքների նման լայնածավալ ոչնչացման համար»,- ասել է նա։

Սպիտակ տունը հինգշաբթի հայտարարել է, որ չի աջակցի իսրայելական խոշոր ռազմական գործողություններին Ռաֆահում:
Նախօրեին ՀԱՄԱՍ-ի պատվիրակությունը մեկնել էր Եգիպտոս՝ հրադադարի հնարավոր համաձայնագրի հետագա քննարկման համար: Նախորդը մերժվել էր Նեթանյահուի կողմից՝ չնայած ԱՄՆ պետքարտուղար Էնթոնի Բլինքենի ջանքերին։

Այս շաբաթվա սկզբին Եգիպտոսը նախազգուշացրել է Իսրայելին, որ Գազայի բնակիչների հնարավոր արտագաղթը Ռաֆահից Եգիպտոս, եթե քաղաքում լայնամասշտաբ գործողություն սկսվի, կհանգեցնի Եգիպտոսի և Իսրայելի միջև խաղաղության համաձայնագրի չեղարկմանը: Կահիրեն հասկացրել է, որ փախստականների անվերահսկելի իրավիճակն իր համար կարմիր գիծ է։