14.12.2025 | 11:41
Ապարանի համայնքապետարանը՝ քամու պատճառած վնասների մասին
Իսրայելն ընդլայնում է Գազայի հատվածի հարավում՝ դեպի Եգիպտոսի սահման ռազմական գործողությունները
Քաղաքականություն
08.02.2024 | 22:52
Իսրայելի վարչապետ Բենիամին Նեթանյահուն «խելագարություն» է անվանել ՀԱՄԱՍ-ի պահանջները և ասել, որ չի ընդունի համաձայնությունը, որը խմբավորմանը կթողնի Գազայի հատվածի ամբողջական կամ մասնակի վերահսկողությունը: Նեթանյահուի խոսքով՝ ռազմական ճնշումը պատանդներին ազատելու լավագույն միջոցն է, գրում է Euronews-ը։
«ՀԱՄԱՍ-ի խելահեղ պահանջների առջև կապիտուլյացիան ոչ միայն չի հանգեցնի առևանգվածների ազատ արձակմանը, այլև կհրահրի նոր ջարդ»,- ասել է Նեթանյահուն։
Կառավարության ղեկավարը հայտնել է նաև, որ բանակը հրաման է ստացել ընդլայնել գործողությունը Գազայի հատվածի հարավում՝ Եգիպտոսի հետ սահմանին գտնվող Ռաֆահ քաղաքում։
«Մենք լիակատար հաղթանակի ճանապարհին ենք, հաղթանակը մեր ձեռքերում է, դա տարիների կամ տասնամյակների հարց չէ, դա ամիսների հարց է: Իսրայելի պաշտպանության բանակը հրաշքներ է գործում և համակարգված առաջ է շարժվում՝ հասնելու բոլոր նպատակներին, որոնք մենք քաղաքական մակարդակով պահանջում էինք՝ ՀԱՄԱՍ-ի ոչնչացում, բոլոր պատանդների ազատ արձակում և խոստում, որ Գազայի հատվածը վտանգ չի ներկայացնի Իսրայելի համար»,- հայտարարել է Նեթանյահուն։
ԱՄՆ պետքարտուղար Էնթոնի Բլինքենը հայտարարել է, որ Վաշինգտոնը հանձնառու է հակամարտությանը դիվանագիտական լուծում տալու հարցում։ Նա աջակցություն է հայտնել Իսրայելին, սակայն Գազայի հատվածում խաղաղ բնակիչներին պաշտպանելու միջոցներն անբավարար է անվանել։ Բլինքենն ասել է, որ Իսրայելի պաշտպանության բանակի գործողություններից ամենօրյա զոհերի թիվը չափազանց բարձր է:
Հինգշաբթի ՀԱՄԱՍ-ի պատվիրակությունը բանակցություններ է վարել միջնորդների հետ Կահիրեում։ Եգիպտոսը պաղեստինա-իսրայելական հակամարտության երկու կողմերին կոչ է արել «անհրաժեշտ ճկունություն ցուցաբերել»։
Հիշեցնենք, որ ավելի վաղ Եգիպտոսը զգուշացրել է, որ իսրայելական զորքերի տեղակայումը սահմանի երկայնքով կսպառնա խաղաղության պայմանագրին, որը կնքվել է երկու երկրների միջև ավելի քան 4 տասնամյակ առաջ։ Եգիպտոսը մտավախություն ունի, որ ռազմական գործողությունների ընդլայնումը դեպի Ռաֆահ սարսափած պաղեստինցիներին կստիպի հատել սահմանը, իսկ սա սցենար է, որը Եգիպտոսը թույլ չի տա։
Եգիպտոսի նախագահ Աբդել Ֆաթահ ալ-Սիսիի հետ հանդիպման ժամանակ Բլինքենը կրկնել է, որ պաղեստինցիները չպետք է վտարվեն Գազայից։
