Քաղաքականություն
07.02.2024 | 23:14
2023 թվականի փետրվարի 6-ին տեղի ունեցած ավերիչ երկրաշարժերից հետո Թուրքիայի՝ երկրաշարժից տուժած հարավ-արևելյան գոտում 57,015 հետցնցում է գրանցվել, որոնք ազդել են 11 նահանգների և երկրի մակերեսի մոտավորապես 14 տոկոսի վրա։ Այս մասին թուրքական պետական Անադոլու գործակալությանը հայտնել է աղետների կառավարման հարցերով պրոֆեսոր Բյուլենթ Օզմենը։
«Երկրաշարժի գոտում ցնցումներ են եղել օրական միջինը 156 անգամ, շաբաթական 1069 անգամ կամ ամսական 4751 անգամ»,- ասել է Օզմենը, որը դասավանդում է Անկարայի Գազի համալսարանում։
7,7 և 7,6 մագնիտուդով երկրաշարժերի էպիկենտրոն Քահրամանմարաշ նահանգում ամենաշատ հետցնցումներն են եղել՝ ընդհանուր 20,761։
«Քահրամանմարաշն օրական միջինը 56 երկրաշարժ է տեսել, շաբաթական՝ 399, ամսական՝ 1730 երկրաշարժ»,- ասել է Օզմենը՝ նշելով, որ հարևան Մալաթիա նահանգում, ընդհանուր առմամբ, գրանցվել է 15,965 ցնցում։
Փետրվարի 6-ի հիմնական երկրաշարժից հետո 24 ժամվա ընթացքում գրանցվել է ավելի քան 570 հետցնցում, իսկ հետագա երեք շաբաթվա ընթացքում գրանցվել է ավելի քան 10,000 ցնցում:
Թեև այդ հետցնցումների հաճախականությունն ու ինտենսիվությունը նվազել է, դրանք դեռևս վտանգ են ներկայացնում:
Հավելենք, որ Թուրքիայում ավերիչ երկրաշարժերի հետևանքով պաշտոնապես զոհերի թիվը գերազանցում է 53,500-ը, վիրավորների թիվը 107,000 է, 38,901 շենք ավերված է: Չնայած արագ վերականգնման վերաբերյալ կառավարության խոստումներին՝ 691,000 մարդ դեռևս բնակվում է կոնտեյներային տներում:
Էմմա Չոբանյան
