Իսրայելի դեսպանը կանչվել է ՌԴ ԱԳՆ՝ Մոսկվա ՀԱՄԱՍ-ի այցերը քննադատելու համար

ՌԴ ԱԳ նախարարություն է կանչվել Մոսկվայում Իսրայելի դեսպան Սիմոնա Հալպերինը։ Նշվում է, որ պատճառն իսրայելցի դիվանագետի «անընդունելի հրապարակային հայտարարություններն են», որոնք, իբր, խեղաթյուրում են «ռուսական արտաքին քաղաքական մոտեցումներն ու պատմական իրողությունները», գրում է DW-ի ռուսական ծառայությունը։

Բացի այդ, հայտարարության մեջ նշվում է, որ Հալպերինի որոշ հայտարարություններ «չափազանց անհաջող մեկնարկ են դիվանագիտական առաքելության համար, որը պետք է ուղղված լինի երկկողմ հարաբերությունների զարգացմանը՝ ի շահ երկու երկրների ժողովուրդների»։

Սիմոնե Հալպերինը, որը Իսրայելի դեսպանի պաշտոնում դիվանագիտական ծառայությունը սկսել է հունվարին, փետրվարի 4-ին «Կոմերսանտ»-ին տված հարցազրույցում խստորեն քննադատել է Ռուսաստանի ղեկավարության շփումները ՀԱՄԱՍ խմբավորման հետ։

«Համասցիներին Մոսկվայում ընդունում են, գրկում, նրանց առջև գորգերով ճանապարհներ են բացում։ Մենք չենք կարող դա հասկանալ։ ՌԴ-ում ասում են, որ այդ բանակցություննեըը վարում են գերիներին ազատ արձակելու համար։ Բայց արդեն 4 ամիս է՝ այդ մարդիկ գերության մեջ են, նրանց ազատ չեն արձակում»,- հայտարարել է նա։

Հալպերինի խոսքով՝ 2023 թվականի հոկտեմբերի 7-ին Իսրայելի վրա ՀԱՄԱՍ-ի լայնամասշտաբ հարձակումից հետո իր մերձավորարևելյան քաղաքականությամբ ՌԴ-ն կորցնում է իսրայելցիների, այդ թվում՝ ռուսախոսների հավանությունը։

«ՌԴ-ն, որ ինքն է տուժում ահաբեկչություններից, չի աջակցում ահաբեկչության դեմ Իսրայելի պայքարին։ Ընդհակառակը, իր համերաշխությունն է հայտնում Հարավ-Աֆրիկյան Հանրապետությանը, որն ընդդեմ Իսրայելի ՄԱԿ-ի Միջազգային դատարան է դիմել աբսուրդային հայցով՝ Թել Ավիվին մեղադրելով ցեղասպանության մեջ»,- հավելել է իսրայելցի դիվանագետը։