Թելյոր Սվիֆթի ռեկորդն ու Մայլի Սայրուսի առաջին հաղթանակը․ հայտնի են «Գրեմմի-2024»-ի հաղթողները

Լոս Անջելեսում տեղի է ունեցել «Գրեմմի»-ի 66-րդ ամենամյա մրցանակաբաշխությունը։ Reuters-ի փոխանցմամբ՝ «Տարվա լավագույն ալբոմ» անվանակարգում հաղթել է երգչուհի Թեյլոր Սվիֆթը՝ «Midnights» ալբոմով։

Այսպիսովմ նա ռեկորդ է սահմանել՝ դառնալով առաջին արտիստը, որը չորս անգամ արժանացել է «Գրեմմի»-ի լավագույն ալբոմի համար: Նա շրջանցել է Ֆրենկ Սինատրային, Փոլ Սայմոնին և Սթիվի Ուանդերին, որոնք այս անվանակարգում երեք անգամ են հաղթել։ Սվիֆթը ստացել է նաև մրցանակ լավագույն փոփ վոկալ կատարման համար։

«Գրեմմի»-ի գլխավոր մրցանակներն այս տարի բաժին են հասել կանանց։ Բիլլի Այլիշն արժանացել է տարվա լավագույն երգ մրցանակին՝ «What Was I Made For»-ի համար։

Տարվա լավագույն ձայնագրություն է ճանաչվել Մայլի Սայրուսի «Flowers» հիթը։ Երգչուհին հաղթել է նաև «Լավագույն փոփ-սոլո կատարում» անվանակարգում։ Այսպիսով, Մայլի Սայրուսն արժանացել է իր կարիերայի առաջին «Գրեմմի» մրցանակներին։

Վիկտորյա Մոնեն հաղթել է «Լավագույն նոր կատարող» և «Լավագույն R&B ալբոմ» անվանակարգերում («Jaguar II» ալբոմի համար): SZA-ը հաղթել է «Լավագույն R&B երգ» անվանակարգում՝ «Snooze» երգով։ Նա նաև մրցանակ է ստացել «Լավագույն պրոգրեսիվ R&B ալբոմ» անվանակարգում՝ «SOS» ստեղծագործության համար։

Ռեփեր Killer Mike-ը «Գրեմմի» է ստացել «Լավագույն ռեփ ալբոմ» («Michael» ձայնագրության համար) անվանակարգում, ինչպես նաև հաղթել է «Լավագույն ռեփ երգ» և «Լավագույն ռեփ կատարում» անվանակարգերում՝ «Scientists» & Engineers» երգի համար։

Ուշագրավ է, որ մրցանակաբաշխությունից անմիջապես հետո ոստիկանությունը ձերբակալել է ռեփերին՝ հարձակման կասկածանքով:

Լավագույն ռոք կատարում է ճանաչվել Boygenius-ի Not Strong Enough-ը, լավագույն ռոք ալբոմ՝ Paramore-ի This Is Why-ը:

«Լավագույն երաժշտական տեսահոլովակ» անվանակարգում հաղթել  է The Beatles-ի I’m Only Sleeping երգի տեսահոլովակը։

Էմմա Չոբանյան