15.09.2026 | 21:24
Հրապարակվել են հոկտեմբերի 25-ին կայանալիք ՏԻՄ ընտրությունների ընտրողների ցուցակները
Ալմաթիում մեկնարկում է ԵՏՄ միջկառավարական խորհրդի նիստը
Քաղաքականություն
01.02.2024 | 14:24
Փետրվարի 2-ին Ալմաթիում տեղի կունենա Եվրասիական միջկառավարական խորհրդի նիստը, իսկ այսօր մեկնարկում է Digital Almaty 2024 միջազգային ֆորումը, որին կմասնակցեն ԵՏՄ կառավարությունների ղեկավարները, գրում է Սպուտնիկի ղազախստանյան ծառայությունը։
Աղբյուրի փոխանցմամբ՝ Ղազախստանի հարավային մայրաքաղաք կգնան Հայաստանի վարչապետ Նիկոլ Փաշինյանը, Բելառուսի վարչապետ Ռոման Գոլովչենկոն, Ղազախստանի վարչապետ Ալիխան Սմայլովը, Ղրղզստանի Նախարարների կաբինետի նախագահ Ակըլբեկ Ջապարովը, Ռուսաստանի Դաշնության կառավարության ղեկավար Միխայիլ Միշուստինը, ԵՏՀ Կոլեգիայի նախագահ Բակիտժան Սագինտաևը։
Օրակարգում է ԵՏՄ ինտեգրացիոն տեղեկատվական համակարգերի զարգացումը, ԵՏՄ-ում էլեկտրոնային առևտրի զարգացման համար բարենպաստ պայմանների ստեղծումը, ԵՏՄ երկրների երկաթուղիների ինտեգրացիոն փոխգործակցությունը։
Եվրասիական միջկառավարական խորհուրդը կքննարկի նաև ԵՏՄ երկրներում մակրոտնտեսական իրավիճակը և կայուն տնտեսական զարգացումն ապահովելու առաջարկները։
Նախատեսվում է քննարկել ԵՏՄ անդամ երկրների համատեղ նախագծերը գյուղատնտեսական ապրանքների և սննդամթերքի երկաթուղային և մուլտիմոդալ փոխադրումների վերաբերյալ «Եվրասիական Ագրոէքսպրես»-ը։
Հիշեցնենք՝ 2024 թվականի հունվարի 1-ից Հայաստանը ստանձնել է ԵՏՄ նախագահությունը։
