14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Թուրքիայի բանկերը սկսել են փակել ՌԴ-ից ընկերությունների հաշիվները
Քաղաքականություն
01.02.2024 | 23:16
Թուրքիայի մի շարք մասնավոր բանկեր փակել են ռուսական ընկերությունների հաշիվները, ինչը պայմանավորված է պատժամիջոցների հետ կապված ԱՄՆ-ի աննախադեպ ճնշումներով։ Այս մասին ՌԻԱ Նովոստիին անանունության պայմանով հայտնել է երկրի բանկային հատվածի աղբյուրը։
«Վեդոմոստին» էլ, վկայակոչելով Թուրքիայի հետ բիզնեսով զբաղվող ձեռնարկատերերին, ֆինանսական խորհրդատուներին և բիզնես ասոցիացիաների ներկայացուցիչներին, գրում է, որ որոշ թուրքական բանկեր սկսել են փակել ռուսական ընկերությունների հաշիվները և խստացնել ՌԴ-ից ֆիզիկական անձանց նկատմամբ պահանջները։
Լրատվամիջոցի զրուցակիցներից մեկը նշել է, որ թուրքական բանկերը ռուսական ընկերությունների հաշիվներ փակել են դեռևս 2022 թվականին, բայց այն ժամանակ խոսքը պատժամիջոցների ենթարկված կազմակերպությունների մասին էր։ Այժմ այլ ընկերությունների հետ հարաբերությունները դադարեցվում են։
«Այո, կան հաշիվների փակման նման օրինակներ։ Դա պայմանավորված է ԱՄՆ-ի ճնշմամբ, աննախադեպ ճնշումներով», – ասել է գործակալության զրուցակիցը։
Թուրքական Ekonomim-ը հայտնել էր, որ Թուրքիայի Առևտրի նախարարությունը կազմել է այն ընկերությունների ցուցակը, որոնք խնդիրներ ունեն Ռուսաստանից վճարումների հետ կապված, և միջոցներ են ձեռնարկվում։ Լրատվամիջոցը նշել էր, որ թուրք արտահանողները բախվել են բանկերի մերժումների հետ, որոնք հրաժարվում են Ռուսաստանից դրամական փոխանցումներ ընդունել ապրանքների դիմաց վճարելու համար։
Հիշեցնենք, որ ավելի վաղ էլ լրատվամիջոցները հայտնել էին, որ թուրքական բանկերը հրաժարվում են աշխատել ռուսական բանկերի հետ՝ վախենալով պատժամիջոցներից։ Խոսքը թե՛ թղթակցային հարաբերությունների խզման, թե՛ առանց պայմանագրերի պաշտոնական փակման վճարումների գործընթացի կասեցման մասին է։
Էմմա Չոբանյան
