12.08.2026 | 11:53
2026 թվականի ավարտին Հայաստանում կգործեն 27 երիտասարդական միջավայրեր. ԿԳՄՍ նախարարի ուղերձը
Արդյո՞ք Ալիևները պատրաստվում են գնել SOCAR-ն ու Ադրբեջանի պետական խոշորագույն այլ ընկերություններ
Քաղաքականություն
31.01.2024 | 23:28
Ադրբեջանի էկոնոմիկայի նախարարության գույքի հարցերով պետական ծառայության ղեկավար Մեթին Էյնուլաևը հայտարարել է, որ 2024 թ-ի ընթացքում խոշոր պետական ընկերությունների պետական բաժնետոմսերի մի մասը մասնավոր ներդրողներին վաճառելու առաջարկներ են պատրաստվելու։ Խոսքը պետական նավթային SOCAR, AzerGold, ASCO, BakTelecom, AzTelekom ընկերությունների և ABB բանկի մասին է։
«Անցյալ տարեվերջին Ադրբեջանի նախագահը հրամանագիր է ստորագրել պետական ձեռնարկություններում մասնավոր հատվածի ներդրումների ներգրավման մասին։ Այս հրամանագրով մենք առաջարկներ ենք պատրաստում բոլոր պետական ձեռնարկությունների համար։ Առաջարկությունների նախապատրաստումը պետք է ավարտվի ինը ամսվա ընթացքում։ Խոսքը բաժնետոմսերի փաթեթների վաճառքի մասին է, ոչ թե ուղղակի սեփականաշնորհման»,- ասել է Էյնուլաևը։
Պաշտոնյան ասել է, որ տեղացի և օտարերկրյա ներդրողները կկարողանան մասնակցել արտադրական ասոցիացիաների և փակ բաժնետիրական ընկերությունների բաժնետոմսերի գնմանը, որոնց բաժնետոմսերի 100 տոկոսը ներկայումս պատկանում է պետությանը:
Այս լուրերի տարածումից hետո ադրբեջանական տիրույթում ակտիվորեն քննարկվում է, որ Ադրբեջանի նախագահ Իլամ Ալիևն ու նրա ընտանիքի անդամներն են պատրաստվում պետական ընկերությունների ակցիաները ձեռք բերել։
Օրերս էլ «Ազատություն» ռադիոկայանի ադրբեջանական ծառայությունը հետաքննությամբ ներկայացրել էր, թե ինչպես են Ալիևներին պատկանող բանկերը տարիներ շարունակ ցածր տոկոսով գումարներ ստացել Կենտրոնական բանկից ու Պետական զարգացման ֆոնդից, հետո այն մի քանի անգամ ավելի բարձր տոկոսադրույքով տրամադրել բնակչությանը՝ գերշահույթ ստանալով։
Էմմա Չոբանյան
