Հունգարիան համաձայն է Ուկրաինային ԵՄ օգնություն տրամադրելուն․ Օրբան

Հունգարիայի վարչապետ Վիկտոր Օրբանը հաստատել է, որ փետրվարի 1-ին Բրյուսելում կայանալիք գագաթնաժողովից առաջ պատրաստ է մեղմել իր դիրքորոշումը Ուկրաինային ԵՄ-ի առաջարկած օգնության փաթեթի վերաբերյալ, որը ֆինանսավորվելու է դաշինքի բյուջեից։ Այս մասին Օրբանը հայտարարել է ֆրանսիական Le Point-ի հետ զրույցում, փոխանցում է BBC-ի ռուսական ծառայությունը։

«Հունգարիան պատրաստ է մասնակցել ԵՄ անդամ 27 երկրների խնդրի լուծմանը, եթե երաշխավորում եք, որ ամեն տարի մենք կորոշենք՝ ուղարկե՞լ այդ գումարը, թե՞ ոչ։ Եվ այս տարեկան որոշումը պետք է ունենա նույն իրավական հիմքը, ինչ այսօր․ այն պետք է լինի միաձայն»,- ասել է Օրբանը։

Նա ԵՄ-ի կողմից Կիևին ցուցաբերվելիք ֆինանսական ու ռազմական աջակցության հարցում նման «փոխզիջում» արդեն իսկ հնչեցրել է։ Եվրոպական շատ երկրներ դա անընդունելի են համարում։

Le Point-ին տված հարցազրույցում Օրբանը նաև ասել է, որ վստահ է FT-ի հրապարակման ճշգրտության մեջ:

«Եթե Financial Times-ը հրապարակի փաստաթուղթ, որտեղ մանրամասն նկարագրվում է Հունգարիայի ֆինանսական շրջափակման և մեր դեմ շանտաժի սցենարը, ապա մենք կարող ենք վստահ լինել, որ այն կա»,- ասել է նա։

Հիշեցնենք՝ Financial Times-ը գրել էր, որ ԵՄ իշխանությունները ծրագիր են մշակել, որ եթե Հունգարիայի վարչապետ Վիկտոր Օրբանն արգելափակի Ուկրաինային նոր օգնությունը փետրվարի 1-ին նախանշված ԵՄ արտակարգ գագաթնաժողովում, դաշինքի մյուս երկրների և կառավարությունների ղեկավարները հրապարակայնորեն կհայտարարեն, որ Հունգարիայի վարչապետի «ապակառուցողական պահվածքի լույսի ներքո իրենք չեն կարող թույլ տալ» Բուդապեշտին ստանալ ԵՄ փողերը։

Էմմա Չոբանյան