Քաղաքականություն
29.01.2024 | 14:56
ԵՄ իշխանությունները ծրագիր են մշակել, որ եթե Հունգարիայի վարչապետ Վիկտոր Օրբանն արգելափակի Ուկրաինային նոր օգնությունը փետրվարի 1-ին նախանշված ԵՄ արտակարգ գագաթնաժողովում, դաշինքի այլ երկրների և կառավարությունների ղեկավարները հրապարակայնորեն կհայտարարեն, որ Հունգարիայի վարչապետի «ապակառուցողական պահվածքի լույսի ներքո իրենք չեն կարող թույլ տալ» Բուդապեշտին ստանալ ԵՄ փողերը։ Այս մասին հայտնում է Financial Times-ը՝ վկայակոչելով ԵՄ պաշտոնյաների պատրաստած գաղտնի պլանը։
Փաստաթուղթը նախանշում է ռազմավարությունը, որն ուղղված է Հունգարիայի տնտեսության թույլ կողմերի դեմ, ազգային արժույթը խաթարելուն և երկրի ներդրումային գրավչության նվազեցմանը՝ վնասելու «աշխատատեղերին և զարգացմանը»:
Առանց ԵՄ ֆինանսավորման, ըստ փաստաթղթի, «ֆինանսական շուկաներն ու եվրոպական և միջազգային ընկերությունները կարող են ավելի քիչ հետաքրքրված լինել Հունգարիայում ներդրումներ կատարելու հարցում»: Իր հերթին, դա կարող է «առաջացնել պետական դեֆիցիտի ֆինանսավորման ծախսերի հետագա աճ և արժույթի արժեզրկում»։
Հունգարիայի կառավարության՝ Եվրոպական միության հարցերով նախարար Յանոշ Բոկան ասել է, որ ինքը տեղյակ չէ նման սպառնալիքների մասին, և Հունգարիան, նրա խոսքով, «չի ենթարկվում ճնշումներին»։
«Հունգարիան չի կապում Ուկրաինային աջակցության և ԵՄ-ի միջոցների հասանելիության միջև և չի ընդունում, որ այլ երկրներ դա անեն»,- ասել է Բոկան։
Նա հավելել է, որ Բուդապեշտը նոր առաջարկ է ուղարկել Բրյուսել, որում նա պայմանականորեն համաձայնել է, որ ԵՄ բյուջեի միջոցները կօգտագործվեն Ուկրաինային օգնելու համար, եթե Հունգարիային թույլ տան ապագայում փոխել իր որոշումը։ ԵՄ երեք դիվանագետներ անանունության պայմանով FT-ին հայտնել են, որ ԵՄ շատ երկրներ սատարում են առաջարկվող պլանը:
«Տրամադրությունն ավելի է կոշտացել։ Ի՞նչ միություն ունենք, եթե թույլ տանք նման վարքագիծ»,- ասել է աղբյուրներից մեկը։
«Խաղադրույքները մեծ են: Սա շանտաժ է»,- հավելել է մեկ ուրիը:
Հունգարիայի վարչապետ Վիկտոր Օրբանը 2023 թվականի դեկտեմբերին արգելափակել էր Ուկրաինային 50 միլիարդ եվրոյի չափով տնտեսական օգնություն հատկացնելու՝ Եվրամիության որոշումը։
Դրանից հետո ԵՄ-ն սկսել է աշխատել Ուկրաինային ավելի քան 20 միլիարդ եվրո արժողությամբ ռազմական օգնության նոր հիմնադրամ ստեղծելու ուղղությամբ։ Ակնկալվում է, որ երկու հարցերն էլ կքննարկվեն փետրվարի 1-ին նախատեսված ԵՄ արտակարգ գագաթնաժողովում:
2022 թվականին ԵՄ իշխանություններն արգելափակել են Հունգարիային մոտ 30 միլիարդ եվրոյի հատկացումը՝ կապված այն բանի հետ, որ երկիրը խնդիրներ ունի օրենքի գերակայության և կոռուպցիայի հետ։ Գումարը ստանալու համար Բուդապեշտը պետք է կատարի որոշակի պահանջներ։
2023 թվականի դեկտեմբերին Հունգարիան հայտարարել է, որ կատարել է պահանջներից մեկը և ամրապնդել դատական համակարգի անկախությունը, որից հետո ԵՄ-ն երկրին հատկացրել է 10 միլիարդ եվրո։ Միաժամանակ, շուրջ 20 մլրդ եվրո արգելափակված է մնացել։
