Քաղաքականություն
30.01.2024 | 15:24
Պակիստանի դատարանը նախկին վարչապետ Իմրան Խանին դատապարտել է 10 տարվա ազատազրկման։ Ըստ մեղադրական եզրակացության՝ նա բացահայտել է Վաշինգտոնում Պակիստանի դեսպանի կողմից կառավարություն ուղարկված գաղտնի հեռագրի բովանդակությունը, գրում է BBC-ի ռուսական ծառայությունը։
Դատավճիռը հրապարակել է հատուկ դատարանը։ Հաղորդվում է, որ Պակիստանի ԱԳ նախկին նախարար Շահ Մահմուդ Քուրեշին ևս 10 տարվա ազատազրկման է դատապարտվել։ 2022 թվականին վարչապետի պաշտոնից հեռացված Իմրան Խանն արդեն իսկ երեք տարվա բանտարկության էր դատապարտվել կոռուպցիայի մեղադրանքով։
Նախկին վարչապետի դեմ հարյուրի հասնող քրեական գործեր կան հարուցված։ Նրան առաջադրված մեղադրանքները բազմաբնույթ են՝ հայհոյանք, կոռուպցիա, ահաբեկչություն և այլն։ Խանը պնդում է, որ իր դեմ արշավը կազմակերպվել է իր վերադարձը կանխելու համար:
Նոր դատավճիռն էլ կայացվել է համընդհանուր ընտրություններից մեկ շաբաթ առաջ և նրան կզրկի քաղաքականություն վերադառնալու հնարավորությունից։ Նախկին վարչապետի «Թեհրիք-ի- Ինսաֆ» կուսակցությունը քրեական գործը շինծու է համարում և մտադիր է վիճարկել դատավճիռը։
«Մենք չենք ընդունում այս անօրինական որոշումը», – գրել է Խանի փաստաբան Նաիմ Փանջուտան X-ի իր էջում։
