08.09.2026 | 17:42
Ռուսաստանում գեներալի սպանության փորձի կասկածանքով Մոլդովայի քաղաքացի է ձերբակալվել
Ինչպես է պարեկը կանոն խախտում. 2021-ից ի վեր ծառայության մեքենաների 2/3-ը վթարվել է. ՏԵՍԱՆՅՈՒԹ
Հասարակություն
29.01.2024 | 20:47
Պարեկային ծառայության ներդրումից ի վեր հաշվեկշռում առկա 645 ծառայողական ավտոմեքենաներից վթարվել է 428-ը: Factor TV-ի հարցմանն ի պատասխան՝ այս մասին հայտնել են Պարեկային ծառայությունից։
«Ճանապարհային երթևեկության անվտանգություն և վերահսկողություն» ՀԿ անդամ Արտակ Գաբոյանն այս թիվը բավական մեծ է համարում։ Նրա կարծիքով՝ պատճառը պարեկային ծառայողների կողմից օրենքին լավ չտիրապետելն է կամ կանոններն անտեսելը, երբ ծառայողները չեն միացնում ձայնային ազդանշանը:
Այդպիսի մի դեպք էլ հունվարի 28-ին Factor TV-ն է արձանագրել Աբովյան քաղաքում։ Պարեկային ծառայության «Տոյոտա» մակնիշի ավտոմեքենան Երևանյան փողոցում հատում է հոծ գիծը՝ առանց ձայնային ազդանշանը միացնելու։ Եվ, հաշվի առնելով, որ շրջադարձից հետո մեքենան խաչմերուկում կանգ է առնում կարմիր լույսի տակ, ապա ենթադրելի է, որ հրատապ ահազանգ չի եղել՝ արձանագրում է «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը, որը նաև Ոստիկանության բարեփոխումները համակարգող խորհրդի անդամ է եղել։
Իոաննիսյանն ընդգծում է՝ պարեկային ծառայողներից շատերը սկսնակ են, և նրանց մասնակցությամբ վթարների մեծ մասը սրա հետ է կապված, բացի այդ, նշում է, որ Պարեկային ծառայութան մեքենաները շատ են շահագործվում։
Ստացվում է, որ 2021 թվականի հուլիսից մինչ այժմ պարեկային ծառայության մեքենաների երկու երրորդը ՃՏՊ-ի մասնակից է եղել: Ըստ Արտակ Գաբոյանի՝ նման ցուցանիշը կախված է նաև այն հանգամանքից, որ պարեկային ծառայողները հաճախ նաև հաշվի չեն առնում, թե ինչպես և որտեղ են կայանում ավտոմեքենան։
Երբեմն էլ, Դանիել Իոաննիսյանի խոսքով, պարեկներին այլ ելք չի մնում, քան վթարի գնով կասեցնել փախուստի դիմող օրինախախտ վարորդի ընթացքը։ Այս ամենի հետ մեկտեղ Իոաննիսյանը խոստովանում է՝ պարեկային ծառայողները հաճախ երթևեկության կանոնները խախտում են առանց ծառայողական անհրաժեշտության։
Պարեկային ծառայության հաշվեկշռում առկա վթարված ավտոմեքենաները տարբեր մակնիշների են՝ «Շկոդա», «Տոյոտա», «Շևրոլե», «Միցուբիշի» և այլն։ Դանիել Իոաննիսյանի խոսքով՝ այս մեքնենաների վերանորոգումը բավական երկար է տևում` չնայած երաշխիքային սպասարկմանը։
Պարեկային ծառայության պետից խնդրել էինք նաև հայտնել, թե որքան ժամանակ է անհրաժեշտ, որպեսզի վթարված մեքենաները շարք վերադարձվեն։ Արթուր Խուդինյանը, սակայն, հարցման պատասխանում տեղեկացրել է, որ դա կապված է պատճառված վնասի չափից։ Որպեսզի վիճակագրությունը բարելավվի, ոլորտի մասնագետները մեկ լուծում են տեսնում․ պարեկները պետք է անվերապահորեն հետևեն օրենքներին ու երթևեկության կանոններին։
Մանրամասները` տեսանյութում:
Արփի Հակոբյան
