20.05.2026 | 10:03
«Արսենալը» 22 տարի անց դարձել է Անգլիայի չեմպիոն․ ՏԵՍԱՆՅՈՒԹ
Ադրբեջանում կալանավորել են հակակառավարական ցույցերի կոչեր հնչեցրած ակտիվիստին
Քաղաքականություն
29.01.2024 | 19:44
Ադրբեջանի իշխանությունները կալանավորել են մի քանի օր առաջ անհետացած բլոգեր, ակտիվիստ Արզու Սայադօղլուին։ Ադրբեջանական լրատվամիջոցների հաղորդմամբ՝ բլոգերը ձերբակալվել է, Բաքվի Սաբաիլի դատարանը նրան 4 ամսով կալանավորելու որոշում է կայացրել։
Սայադօղլուին մեղադրանք է առաջադրվել Քրեական օրենսգրքի 182.2.4. (շորթում՝ զգալի չափով գույք զավթելու նպատակով) հոդվածով։ Նրան սպառնում է 5-ից 10 տարի ժամկետով ազատազրկում։ Գործից այլ մանրամասներ չեն հաղորդվում։
Իրավապաշտպան Ռուֆաթ Սաֆարովի խոսքով՝ Սայադօղլուն ձերբակալվել է Ադրբեջանի Պետական անվտանգության ծառայության կողմից։ Ավելի վաղ ՆԳՆ-ն հայտարարել էր, որ Սայադօղլուին բերման ենթարկելուն ոստիկանությունը չի մասնակցել։
Հունվարի 26-ին ակտիվիստները հայտարարել էին, որ չեն կարողանում կապի դուրս գալ Սայադօղլուի հետ այն բանից հետո, երբ նա Azad Soz առցանց լրատվամիջոցի եթերում սուր քննադատության էր ենթարկել Ադրբեջանի իշխանություններին և քաղաքացիներին հակակառավարական ցույցերի դուրս գալու կոչ անել։ Նրանք ենթադրել էին, որ Սայադօղլուն ձերբակալվել է իրավապահ մարմինների կողմից։
Սայադօղլուն, որը YouTube-ում իր սեփական ալիքն ունի, մշտապես քննադատում է երկրում ստեղծված քաղաքական իրավիճակն ու ադրբեջանցի պաշտոնյաների կամայականությունները։
Հավելենք, որ 2023 թվականի նոյեմբերի վերջից Ադրբեջանի իշխանությունները բռնաճնշումների նոր ալիք են սկսել անկախ և ընդդիմադիր լրագրողների, ընդդիմադիր քաղաքական ու հասարակական գործիչների նկատմամբ։
Էմմա Չոբանյան
