16.05.2024 | 12:56
Ոստիկանները բերման ենթարկեցին Կառավարության շենքի մոտ բողոքի ակցիա իրականացնողներին․ ՏԵՍԱՆՅՈՒԹ
100 դրամ աջակցություն՝ բարձրորակ կոնյակի սպիրտի 1 լիտրի համար․ պետությունը արտահանումը խթանող նախագիծ է շրջանառում
Տնտեսություն
26.01.2024 | 15:45
ՀՀ կառավարությունը որոշել է կոնյակի սպիրտի արտահանման աջակցության ծրագիր իրականացնել։ Նախագիծը, որը մշակել է Էկոնոմիկայի նախարարությունը, դրված է e-draft.am կայքում: Համաձայն նախագծի՝ տնտեսավարողներին կտրամադրվի պետական աջակցություն արտահանված յուրաքանչյուր լիտր բարձրորակ կոնյակի սպիրտների համար 100 դրամի չափով։
Ըստ նախագծի՝ նպատակն է աջակցել ՀՀ-ում 2024 թվականին կոնյակի և բրենդիի սպիրտի արտահանմամբ զբաղվող տնտեսավարող սուբյեկտներին՝ կոնյակի և բրենդիի սպիրտների մնացորդների իրացվելիության հետ կապված ռիսկերը մեղմելու և ընթացիկ տարվա խաղողի մթերումների կազմակերպման համար անհրաժեշտ պայմաններ ապահովելու համար: Ինչպես նաև ընդգծվում է՝ տնտեսավարող սուբյեկտների համար ֆինանսական միջոցների ժամանակավոր հասանելիության ստեղծումը՝ պահանջարկի փոփոխվող պայմաններին արձագանքելու, արտաքին մարտահրավերներին դիմակայելու և բնականոն գործունեությունը շարունակելու համար։
Հիմնավորման մեջ գրված է, որ աջակցությունը չի տրամադրվում՝
-ներքին շուկայում իրացված կոնյակի սպիրտների խմբաքանակների համար,
-արտահանված այն խմբաքանակների համար, որոնք չունեն միջազգային հավատարմագրում ունեցող փորձարկման լաբորատորիայի կողմից տրամադրված ածխածնի, ջրածնի և թթվածնի իզոտոպային բաղադրության ու խաղողի հումքով արտադրված լինելու մասին փորձաքննության դրական եզրակացություն։
Նախատեսվում է, որ արտահանվող խմբաքանակների նմուշառումը և դրանց լաբորատոր փորձաքննության արդյունքների ներկայացումը կկատարվի միջազգային հավատարմագիր ունեցող «Էս-ՋԻ-Էս Ինսպեքշն սերվիսիս լիմիթիեդ» ընկերության հայաստանյան մասնաճյուղի (SGS) կողմից՝ տնտեսավարողների միջոցների հաշվին։
Տնտեսավարողների մոտ առկա կոնյակի սպիրտների մնացորդների իրացման աջակցության նպատակով անհրաժեշտություն, ըստ որոշման նախագծի հիմնավորման, նախատեսվում է բարձրացնել դրանց մրցունակությունը և վերը նշված աջակցությունը մասնակիորեն շարունակել մինչև 2024 թվականի դեկտեմբերի 30-ը, որպեսզի տնտեսավարողները կարողանան իրացնել կոնյակի սպիրտի մնացորդները և մինչև 2024 թվականի խաղողի մթերումների սկսելը ունենան արտադրանքի պահման ազատ տարողություններ։
