Թուրքական մեկ «կողմ» ձայն՝ ընդդեմ Ադրբեջանի․ ինչու ԵԽԽՎ-ում Թուրքիան մեծ ակտիվությամբ չաջակցեց Ադրբեջանին

Եվրախորհրդի Խորհրդարանական վեհաժողովը (ԵԽԽՎ) նախօրեին քվեարկությամբ որոշեց չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնակարգային պարտավորությունները կատարելու դեպքում։

Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ է քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։

Դեմ են քվեարկել Թուրքիայի պատվիրակությունից 9 պատգամավոր, ևս մեկ պատգամավոր էլ Ալբանիայից։ Ուշագրավ է, որ Թուրքիայից քվեարկությանը մասնակցել է 10 պատգամավոր, որից մեկը կողմ է քվեարկել ԵԽԽՎ-ից Ադրբեջանին հեռացնելու որոշմանը։

Մասնավորապես, կողմ է քվեարկել Թուրքիայի Ազգային Մեծ ժողովի քրդական DEM կուսակցությունից պատգամավոր Բերդան Օզթյուրքը։

Ի դեպ, Թուրքիայի պատվիրակությունում նաև հայազգի պատգամավոր կա՝ նախագահ Էրդողանի ղեկավարած «Արդարություն և զարգացում» կուսակցությունից Սևան Սըվաջըօղլուն։ Նա թուրքական պատվիրակության այն անդամներից է, որը չի մասնակցել քվեարկությանը։

ԵԽԽՎ-Ադրբեջան՝ օրեր ընթացող այս հակամարտության ֆոնին՝ Թուրքիայի պասիվ վարքագիծն ուշադրություն է գրավում, քանի որ Անկարան, թվում է, կուլիսներում նույնպես լուրջ ակտիվություն չի ցուցաբերել Ադրբեջանին աջակցելու համար՝ գործի դնելով դիվանագիտական ու քաղաքական  ամբողջ գործիքակազմը։

Մասնավորապես, ուկրաինական «Европейская правда»-ի թղթակիցը Բրյուսելից հայտնել էր, որ Թուրքիայի պահվածքը չի վկայում, որ նա ցանկանում է կառույցում կրկնել Ադրբեջանի և Ռուսաստանի ճանապարհը՝ նշելով, որ «ավելին՝ ԵԽԽՎ քննարկումներում թուրքերը զարմանալիորեն պասիվ են և հանդես չեն գալիս իրենց դաշնակցի՝ Ադրբեջանի պաշտպանության օգտին»։

Էմմա Չոբանյան