Թուրքիայի կրոնական վարչությունը պահանջում է հայ գրող Սևան Նիշանյանին քրեական պատասխանատվության ենթարկել

Թուրքիայի կրոնական հարցերով վարչությունը քրեական գործ հարուցելու հարց է ներկայացրել հայ գրող և լեզվաբան Սևան Նիշանյանի դեմ՝ իսլամական ազանի վերաբերյալ նրա խոսքերի համար, գրում է Turkish Minute-ը։

«Ես չգիտեմ որևէ այլ հարձակում, որն այնքան զզվելի է, որքան բարձրախոսների վրա հնչող ազանը: Դա բռնաբարություն է, ոտնձգություն։ Սա Թուրքիայում կյանքի ամենասարսափելի կողմերից մեկն է»,- ասել է Նիշանյանը կիրակի YouTube-ի իր ամենշաբաթյա ուղիղ հեռարձակման ժամանակ, որտեղ նա պատասխանում է իր երկրպագուների հարցերին։

Անկարայի գլխավոր դատախազություն ներկայացված բողոքում ասվում է, որ Նիշանյանի խոսքերը վիրավորանք են իսլամական կրոնական արժեքների և խորհրդանիշների նկատմամբ, ինչպես նաև հանրային պառակտում և լարվածություն են հրահրում:

Կրոնական վարչության ներկայացրած բողոքում ասվում է, որ Նիշանյանի մեկնաբանություններն «անցել են հարգանքի սահմանները» և «ատելություն» հրահրել՝ իսլամական հավատքի և արժեքների նկատմամբ «թշնամական վերաբերմունքով»։ Բողոքով պահանջվում է Նիշանյանին պատասխանատվության ենթարկել։

66-ամյա գրող Սևան Նիշանյանը Թուրքիայում հայտնի է իր հակասական հայացքներով։ 2014 թվականին նա Թուրքիայում բանտարկվել է՝ ապօրինի շինարարության համար։ Նա պնդում է, որ դա պատասխան էր երկրում խոսքի ազատության սահմանափակումների վերաբերյալ իր քննադատությանը:

2017 թվականին խիստ ռեժիմի բանտից փախչելուց հետո Նիշանյանն ապաստան էր խնդրել Հունաստանում, սակայն 2022 թվականի հունվարին արտաքսվել էր, քանի որ կեցության թույլտվության հետ կապված խնդիրներ էր ունեցել: Հայաստանում կարճատև մնալուց հետո այժմ նա ապրում է Մոնտենեգրոյում։

Էմմա Չոբանյան