«Սերժ Սարգսյանին մեղադրյալի կարգավիճակ տրվել է մինչև նրա` որպես վկա հարցաքննությունը». պաշտպան

Հայաստանի երրորդ նախագահ Սերժ Սարգսյանի նկատմամբ քրեական հետապնդումը ապօրինի է սկսվել: Այս մասին այսօր պաշտպանական ճառի ընթացքում հայտարարեց Սարգսյանի պաշտպան Ռուբեն Հակոբյանը:

Պաշտպանի խոսքով` Սերժ Սարգսյանը որպես վկա կանչվել է հարցաքննության, ապա նրա և Գյուղատնտեսության նախկին նախարար Սերգո Կարապետյանի միջև առերեսում է տեղի ունեցել:

Առերեսման ավարտից ընդամենը 2 րոպե հետո, քննիչը, առանց աշխատասենյակից դուրս գալու, նրան է ներկայացրել որպես մեղադրյալ ներգրավելու որոշում:

«Այսինքն` որպես մեղադրյալ ներգրավելու որոշումն արդեն իսկ կազմած, տպագրած և ստորոգրած է եղել, միայն ժամն է բացակայել` հասկանալի պատճառով»,- ասաց Ռուբեն Հակոբյանը` նշելով որ, փաստորեն Սերժ Սարգսյանին մեղադրյալի դատավարական կարգավիճակ տրվել է մինչև նրա` որպես վկայի հարցաքննությունը:

«Սա նշանակում է, որ Սերժ Սարգսյանի` որպես վկայի հարցաքննությունը կրել են ձևական բնութ, մինչ այդ ապացույցներն արդեն ստուգված և գնահատված են եղել, ամենայն հավականությամբ, այլ պաշտոնյաների կողմից, բայց որ ավելի կարևոր է, քննիչները մինչև առերեսումը տեղեկացված են եղել ,թե Սերգո Կարապետյանն առերեսման ժամանակ ինչ ցուցունք է տալու»,- ասաց Ռուբեն Հակոբյանը:

Այս գործի քննության ընթացքում երկու մեղադրյալ` Սերգո Կարապետյանն ու Սամվել Գալստյանը մահացել են: Ռուբեն Հակոբյանը հայտնեց, որ Սերժ Սարգսյանը զրկվել է հակընդդեմ հարցման իրավունքից, այսինքն` Սերժ Սարգսյանը հնարավորություն չի ունեցել իր դեմ վկայություն տված անձանց հարցեր տալու, օրինակ` հնարավորություն չի ունեցել Սերգո Կարապետյանին հարցեր ուղղել նրա՝ լրացուցիչ հարցաքննության ընթացքում հայտնած տեղեկությունների վերաբերյալ:Պաշտպանը խոսեց նաև այն մասին, որ, ըստ ամենայնի, Սերգո Կարապետյանի նկատմամբ ճնշումներ են եղել:

Արաքս Մամուլյան