Քաղաքականություն
24.01.2024 | 20:52
Ադրբեջանի Քրեական օրենսգրքում ավելացվել են 281-1 և 284-2 հոդվածները՝ 2024 թվականի հունվարի 19-ից ուժի մեջ մտած օրենքի համաձայն։ Մասնավորապես, տեղական լրատվամիջոցների հաղորդմամբ, ՔՕ 281-1 հոդվածի համաձայն՝ քրեական պատասխանատվություն է սահմանվում Ադրբեջանի տարածքային ամբողջականությունը խախտելուն ուղղված ատրիբուտների և խորհրդանիշերի ցուցադրման, տարածման, արտադրության, ձեռքբերման, կրելու կամ փոխադրելու համար, որի համար նախատեսված է պատիժ՝ մինչև 5 տարի ժամկետով ազատազրկում։
Քրեական օրենսգրքի նոր՝ 284-2 հոդվածը քրեական պատասխանատվություն է նախատեսում պատերազմի կամ մարտական պայմաններում Ադրբեջանի զինված ուժերի անձնակազմի, զենքի, զինամթերքի կամ ռազմական տեխնիկայի տեղաշարժի կամ տեղակայման մասին տեղեկությունների տարածման համար։ Սրա համար նախատեսվում է պատիժ՝ 3-6 տարի, իսկ ծանր հետևանքների դեպքում՝ 5-ից 8 տարի ժամկետով ազատազրկում։
Ադրբեջանի Պետական անվտանգության ծառայությանը հանձնարարված է իրականացնել այս հանցագործությունների դեպքերով նախաքննությունը։
Էմմա Չոբանյան
