Ռուս-ադրբեջանական համագործակցության «Ճանապարհային քարտեզի» ստորագրումից հետո Ալիևն ընդունել է ՌԴ փոխվարչապետին

Ադրբեջանի նախագահ Իլհամ Ալիևն ընդունել ՌԴ փոխվարչապետ, ռուս-ադրբեջանական միջկառավարական հանձնաժողովի համանախագահ Ալեքսեյ Օվերչուկին։ Ադրբեջանական լրատվամիջոցների հաղորդմամբ՝ հանդիպմանը նշվել է, որ 2023 թվականը հաջող է եղել երկու երկրների տնտեսական համագործակցության արդյունքներով։ Գոհունակությամբ նշվել են նաև  անցյալ տարվա դեկտեմբերին Սանկտ Պետերբուրգում ԱՊՀ պետությունների ղեկավարների ոչ պաշտոնական հանդիպման շրջանակում Ադրբեջանի և Ռուսաստանի նախագահների շփումները։

Զրույցի ընթացքում ընդգծվել է, որ տնտեսական համագործակցությունն ունի լայն օրակարգ, և այս ոլորտում նախատեսվում են նոր ուղղություններ։ Առևտրաշրջանառության 17,5 տոկոսի, ինչպես նաև բեռնափոխադրումների և տարանցիկ փոխադրումների շարունակական աճը գնահատվել է որպես երկկողմ համագործակցության լավ ցուցանիշ։

Կողմերն ընդգծել են ռուս-ադրբեջանական համագործակցության զարգացման հիմնական ոլորտներում 2024-2026 թվականների ճանապարհային քարտեզի ստորագրման կարևորությունը։

«Հանդիպմանը մտքերի փոխանակություն է տեղի ունեցել տրանսպորտի և  լոգիստիկ ապահովման, Հյուսիս-Հարավ տրանսպորտային միջանցքի խթանման հարցերի շուրջ»,- ասվում է հաղորդագրության մեջ։

Նշենք, որ նախօրեին Ադրբեջանի փոխվարչապետ Շահին Մուստաֆաևը և Ռուսաստանի փոխվարչապետ Ալեքսեյ Օվերչուկը Բաքվում ստորագրել էին «Ճանապարհային քարտեզ»՝ ադրբեջանա-ռուսական համագործակցության զարգացման հիմնական ուղղությունների վերաբերյալ։

Մասնավորապես, ադրբեջանական կողմի հաղորդմամբ, ռուս-ադրբեջանական համագործակցության զարգացման հիմնական ուղղությունների վերաբերյալ 2024-2026 թվականների «Ճանապարհային քարտեզը» նախատեսում է առևտրատնտեսական և ներդրումային համագործակցության զարգացմանն ուղղված կոնկրետ քայլերի իրականացում տրանսպորտի, արդյունաբերության, գյուղատնտեսական ոլորտներում, պարենային անվտանգության, ինչպես նաև էներգետիկայի, զբոսաշրջության, հումանիտար և սոցիալական, ինչպես նաև նորարարության և տեղեկատվական տեխնոլոգիաների ոլորտներում։

Օվերչուկը նախօրեին հանդիպել է նաև Ադրբեջանի վարչապետ Ալի Ասադովին։

Էմմա Չոբանյան