Քաղաքականություն
22.01.2024 | 22:17
Մեծ Բրիտանիան ՄԱԿ-ի փորձագետների խմբին է տրամադրել արբանյակային լուսանկարներ Հյուսիսային Կորեայից ՌԴ բեռնափոխադրումների մասին միջազգային պատժամիջոցները խախտող զենքի գործարքների պաշտոնական հետաքննության շրջանակներում, գրում է The Guardian-ը։
Հյուսիսային Կորեան մեղադրվում է Ռուսաստանի կառավարությանը բալիստիկ հրթիռներ և հարյուր հազարավոր հրետանային արկեր մատակարարելու մեջ՝ Ուկրաինայում պատերազմի համար, երբ ՌԴ նախագահ Վլադիմիր Պուտինը սեպտեմբերին Ռուսաստանի հեռավոր արևելքում հանդիպել էր հյուսիսկորեական առաջնորդ Կիմ Չեն Ընին:
Լրատվամիջոցը, որը ծանոթացել է բրիտանական հետախուզության զեկույցին, գրում է, որ արբանյակային պատկերներն արվել են սեպտեմբերից դեկտեմբեր ընկած ժամանակահատվածում: Դրանցում պատկերված են երեք ռուսական նավեր՝ «Մայա», «Անգարա» և «Մարիա»։ Արբանյակային լուսանկարները ցույց են տալիս, թե ինչպես են արկղերը բեռնում ռուսական նավերը հյուսիսկորեական նավահանգստում։
Թեև պարբերականը հայտարարել է, որ չի կարող որոշել, թե ինչ կա բեռնարկղերում, սա հետևում է ԱՄՆ-ի հայտարարությանը, որ Ռուսաստանն անցյալ շաբաթ Ուկրաինայում օգտագործել է Հյուսիսային Կորեայից ստացված բալիստիկ հրթիռներ:
Զեկույցում տեղ գտած բոլոր նավերը պատժամիջոցների տակ են հայտնվել ԱՄՆ կառավարության կողմից 2022 թվականին։
«Ռուսաստանի կողմից Ուկրաինայում հյուսիսկորեական զենքի օգտագործումը ՄԱԿ-ի Անվտանգության խորհրդի բազմաթիվ բանաձևերի խախտում է։ Դա խաթարում է միջուկային զենքի տարածումը կանխելու՝ միջազգային ջանքերը և բացահայտում, թե որքան հուսահատ է դարձել Ռուսաստանն իր անհաջող ներխուժման արդյունքում: Այս և այլ ապացույցները, որոնք ներկայացված են ՄԱԿ-ի պատժամիջոցների կոմիտեին, պետք է լիարժեք հետաքննություն սկսեն Ռուսաստանի և ԿԺԴՀ-ի կողմից միջազգային պատժամիջոցների կոպտագույն խախտումների վերաբերյալ»,- ասել է ՄԱԿ-ի դիվանագետը։
Նշվում է, որ զեկույցը, Միացյալ Նահանգների և այլ երկրների այլ ապացույցների հետ միասին, տրամադրվել է Հյուսիսային Կորեայի միջուկային զենքի տարածման հարցերով ՄԱԿ-ի փորձագետների խմբին: Ակնկալվում է, որ հաջորդ ամիս այն հրապարակելու է իր զեկույցը։
Էմմա Չոբանյան
