Քաղաքականություն
22.01.2024 | 22:32
Ջորջիա Մելոնին շաբաթ օրը Ստամբուլում հանդիպել է Թուրքիայի նախագահ Ռեջեփ Թայիփ Էրդողանին․ սա Իտալիայի վարչապետի առաջին պաշտոնական այցն է արտերկիր այն բանից հետո, երբ Հռոմը ստանձնել է G7-ի նախագահությունը, գրում է Bloomberg-ը, որին վկայակոչում է Al Arabiya-ն։
Ըստ բանակցություններին ծանոթ պաշտոնյայի՝ երկու կառավարությունները մտադիր են մինչև 2030 թվականը բարձրացնել իրենց երկրների միջև առևտրի ծավալը մինչև 32,7 միլիարդ դոլարի (30 միլիարդ եվրո)՝ ներկայիս շուրջ 25 միլիարդ եվրոյից։
Պաշտպանական գործարքները կարող են ներառել իտալական Leonardo SpA-ն, որն աշխատում է օդատիեզերական և անվտանգության ոլորտում ամբողջ աշխարհում:
Հանդիպման օրակարգում եղել է նաև միգրացիան։ Երկու երկրների ղեկավարները քննարկում են Լիբիայի հետ համագործակցության ամրապնդման համաձայնագիրը։ Իտալական լրատվամիջոցների փոխանցմամբ՝ երեք երկրները կարող են միգրացիայի վերաբերյալ համաձայնագիր ստորագրել մինչև ամառ։
Մելոնիի այցը հաջորդում է երկու երկրների ղեկավարների ոչ պաշտոնական բանակցություններին Բալիում, Վիլնյուսում, Նյու Յորքում և Դուբայում միջազգային հանդիպումների շրջանակում։
Էմմա Չոբանյան
