Քաղաքականություն
16.01.2024 | 19:50
Բաքուն Արցախի հայաթափված բնակավայրերում շարունակում է պատրաստվել արտահերթ նախագահական ընտրություններին։ Հայկական բնակավայրերում ստեղծվել է 26 ընտրատեղամաս։
Ադրբեջանի նախագահի աշխատակազմի տարածքային և կազմակերպչական հարցերի վարչության պետի տեղակալ Նիյազ Ալիևը Ստեփանակերտում լրագրողների հետ զրույցում ասել է, որ այդ ընտրատեղամասերում գրանցվել է մոտ 22 հազար ընտրող։ Նրանցից 3700-ը մշտապես տեղափոխվել են այդ տարածքներ: Ավելի քան 18 հազար մարդ էլ շինարարական աշխատանքներում ներգրավված ադրբեջանցիներ են։
Այսպիսով, Բաքուն հերթական շոուն է կազմակերպում Արցախի տարածքներում՝ մեծ թվով ընտրատեղամասեր բացելով և ընտրողների մեծ թիվ ներկայացնելով։
Նշենք, որ Ստեփանակերտում Արցախի նախագահի նստավայրը նույնպես վերածվել է ընտրատեղամասի։
Հիշեցնենք՝ Ադրբեջանի նախագահական ընտրություններին մասնակցելու է 7 թեկնածու, այդ թվում՝ գործող նախագահ Իլհամ Ալիևը։
Հավելենք, որ նախագահական ընտրություններն Ադրբեջանում պետք է տեղի ունենային 2025 թվականին, սակայն Իլհամ Ալիևը 2023 թվականի դեկտեմբերի 7-ին հրամանագիր ստորագրեց՝ 2024-ի փետրվարի 7-ին արտահերթ ընտրություններ անցկացնելու մասին։
Էմմա Չոբանյան
