Թուրքիան դեկտեմբերին ՌԴ-ից նավթի ներկրման նոր ռեկորդ է սահմանել

Ռուսաստանից Թուրքիա նավթի մատակարարումները դեկտեմբերին հասել են ռեկորդային մակարդակի։ Կոմերսանտին հայտնի է դարձել, որ ռուսական նավթային ընկերությունները շարունակում են մեծացնել ծովով նավթի առաքումները Թուրքիա, հիմնականում՝ Բալթյան նավահանգիստներից։

Դեկտեմբերին Թուրքիան ռուսական նավթի ներկրման նոր ռեկորդ է սամանել՝ օրական 444,000 բարել, որը կապված է ադրբեջանական SOCAR-ին պատկանող թուրքական Star նավթավերամշակման գործարանի մատակարարումների ավելացման հետ։

Բացի այդ, Թուրքիա տանող երթուղին պարունակում է նաև նյութատեխնիկական օգուտներ՝ Սուեզի ջրանցքով նավթի մատակարարումների համեմատ:

2023 թվականի դեկտեմբերին Թուրքիան ծովով ներմուծել է ռուսական նավթի ռեկորդային ծավալներ, որը հասել է օրական 444 հազար բարելի՝ ըստ Kpler-ի տվյալների։ Այդ ծավալների մոտ 70 տոկոսն առաքվել է թուրքական Ալիագա նավահանգստով։ Դեկտեմբերին սահմանված ռեկորդային ցուցանիշը կազմում է այդ ամսում Ռուսաստանի ընդհանուր ծովային արտահանման մոտ 13%-ը։ Արտասահման ռուսական ծովային մատակարարումների ևս 76%-ն ուղղվել է Հնդկաստան և Չինաստան:

Նոյեմբերին Ռուսաստանը Թուրքիային մատակարարել է օրական մոտ 432 հազար բարել նավթ։

Նախնական տվյալները ցույց են տալիս, որ ռուսական նավթի արտահանումը Թուրքիա հունվարին նույնպես կգերազանցի օրական 400 հազար բարելը։ Ռուսական մատակարարումները Թուրքիա սկսեցին կտրուկ աճել հոկտեմբերին, երբ LUKOIL-ը սկսեց փոխադրումներն ադրբեջանական SOCAR-ին պատկանող թուրքական Star նավթավերամշակման գործարան։

Լրատվամիջոցը նշում է, որ անցյալ տարվա ընթացքում Թուրքիան եղել է նաև ռուսական դիզվառելիքի ամենամեծ ներկրողը։

Թուրքիա նավթի և վառելիքի մատակարարումների զգալի աճը ՌԴ նավթի և նավթամթերքի նկատմամբ պատժամիջոցների էմբարգոյի հետևանքն է։

Էմմա Չոբանյան