18.03.2026 | 14:13
Միքայել արքեպիսկոպոս Աջապահյանն այցելել է «Իզմիրլյան» ԲԿ
Էստոնիայում Տարտուի համալսարանի պրոֆեսոր է ձերբակալվել՝ ՌԴ հետախուզական ծառայությունների համար աշխատելու կասկածանքով
Քաղաքականություն
16.01.2024 | 22:54
Էստոնիայի Տարտուի համալսարանը հայտարարել է պրոֆեսոր Վյաչեսլավ Մորոզովի հետ աշխատանքային պայմանագրի դադարեցման մասին, որին անվտանգության ոստիկանությունը կասկածում է երկրի դեմ հետախուզական գործունեության մեջ։ Հունվարի 3-ից նա կալանավորված է և գտնվում է Տալլինի բանտում։ Այս մասին ERR-ին հայտնել են Պետական դատախազությունից։
Հաղորդվում է, որ հունվարի 3-ին Անվտանգության ոստիկանությունը բերման է ենթարկել Ռուսաստանի քաղաքացի Վյաչեսլավ Մորոզովին, որը կասկածվում է Էստոնիայի դեմ հետախուզական գործունեություն իրականացնելու մեջ։
Մորոզովի նկատմամբ կասկածների մանրամասները չեն բացահայտվել, սակայն պետական դատախազ Տրիինու Օլևը հայտնել է, որ հետաքննությունը հիմքեր ունի ենթադրելու, որ ազատության մեջ գտնվելիս նա կարող էր խուսափել քրեական հետապնդումից կամ շարունակել հանցագործություններ կատարել։
«Ագրեսոր պետության հետախուզական հետաքրքրությունն Էստոնիայում մնում է բարձր։ Այս դեպքը մի քանի տասնյակից ավելի նախորդ դեպքերի լրացումն է և ցույց է տալիս ռուսական հետախուզական ծառայությունների ցանկությունը՝ ներթափանցելու Էստոնիայի կյանքի տարբեր ոլորտներ, այդ թվում՝ գիտական ոլորտ»,- ասել է Անվտանգության ոստիկանության գլխավոր տնօրեն Մարգո Պալլոսոնը։
Մորոզովը Տարտուի համալսարանում աշխատել է որպես քաղաքագիտության պրոֆեսոր։ Էստոնական ETIS գիտական տեղեկատվական համակարգի տվյալներով՝ Վյաչեսլավ Մորոզովն աշխատել է Սանկտ Պետերբուրգի պետական համալսարանում մինչև 2010 թվականը, դրանից հետո կապվել է Տարտուի համալսարանի հետ։ 2016-2023 թվականները նա Տարտուում զբաղեցրել է Եվրոպական միության և ռուսագիտության պրոֆեսորի, իսկ 2023 թվականի սեպտեմբերի 1-ից մինչև 2024 թվականի հունվարի 11-ը՝ միջազգային քաղաքական տեսության պրոֆեսորի պաշտոնը։
Էմմա Չոբանյան
