Լոնդոնի մետրոյում «ուրվականների հետքեր» են հայտնվել․ իշխանությունները փորձում են ազատվել դրանցից

«Transport for London» (TfL) կազմակերպությունը, որը ղեկավարում է բրիտանական մայրաքաղաքի հասարակական տրանսպորտի ցանցը, փորձում է ազատվել «ուրվականների հետքերից», որոնք հայտնվել են Լոնդոնի տրանսպորտային համակարգում ամենանոր՝ «Elizabeth line»-ի հարթակներում, գրում է BBC-ի ռուսական ծառայությունը։

Մարդկանց ուրվագիծը հիշեցնող բծերը ոչ թե այլաշխարհիկ, այլ բավականին պրոզայիկ բնույթ ունեն․ դրանք առաջացել են նստատեղերի հետևում, երբ ուղևորներն անընդհատ մեջքով հենվում են պատերին:

Լոնդոնի քաղաքային խորհրդի պատգամավոր Քերոլայն Փիդջոնն այդ հարցով դիմել է քաղաքապետ Սադիկ Խանին: Նա հարցադրում է արել, թե ինչպես է TfL-ը երաշխավորում, որ կայանները մաքուր են պահվում, որպեսզի «թարմ տեսք ունենան գալիք տասնամյակների ընթացքում»:

«TfL ցանցի բոլոր կայաններում իրականացվում է մաքրման խիստ ծրագիր՝ ուղևորներին մաքուր և անվտանգ միջավայր ապահովելու համար։ Այնուամենայնիվ, TfL-ը լրացուցիչ ուղիներ է ուսումնասիրում Elizabeth Line կայարանների նստատեղերի հետևում գտնվող պատերը մաքրելու համար՝ հեռացնելու հետքերը և պաշտպանելու պատերն ապագայի համար։ TfL-ը նաև սկսել է նստատեղերի հետևում վինիլային պաշտպանիչ վահանակներ տեղադրելու փորձնական նախագիծ և այժմ ուսումնասիրում է դրա արդյունքները»,- ասվում է պատասխանում:

Elizabeth Line-ի որոշ կայարաններում պատերը պատված են պանելներով, որտեղ «ուրվականների» փոխարեն կարելի է տեսնել գունավոր ֆիգուրներ, ինչպես նաև գնացքների նստատեղերի դիզայնին համապատասխան նախշեր։