Ադրբեջանում նավթի տարեկան արդյունահանումը նվազում է

Ադրբեջանի Էներգետիկայի նախարարության հրապարակած 2023 թվականի պաշտոնական վիճակագրությունը հաստատում է երկրում նավթի արդյունահանման զգալի տարեկան անկումը։ Զեկույցում նշվում է, որ Ադրբեջանն արդյունահանել է 30,2 մլն տոննա նավթ՝ ներառյալ կոնդենսատը, ինչը 7,4%-ով պակաս է 2022 թվականի արդյունահանման ծավալներից, ասվում է ադրբեջանական Թուրան գործակալության անդրադարձում։

Այս ցուցանիշի հիմնական պատճառը Ազերի-Չիրագ-Գյունեշլի բլոկն է, որտեղ նավթի արդյունահանման ծավալը կրճատվել է 12,7 տոկոսով՝ կազմելով 17,8 մլն տոննա։ Հաշվի առնելով, որ այն կազմում է երկրի նավթի ընդհանուր արդյունահանման գրեթե 59 տոկոսը, դրա կատարողականը զգալի ազդեցություն ունի երկրի համընդհանուր թվերի վրա։

Նշվում է, որ մինչ «Շահդենիզ» հանքավայրում կոնդենսատի արդյունահանումը փոքր-ինչ նվազել է՝ հասնելով 4,3 միլիոն տոննայի, Ադրբեջանի պետական ​​նավթային ընկերությունը՝ SOCAR-ը, պահպանել է 2022 թվականի արդյունահանման մակարդակը՝ 7,8 միլիոն տոննա։ Ապշերոնի հանքավայրը, որը համեմատաբար ավելի փոքր դերակատար է, ընդհանուր արտադրությունն ավելացրել է՝ 300 հազար տոննա կոնդենսատ:

Տարվա ընթացքում համաշխարհային շուկաներ է տեղափոխվել 25,2 մլն տոննա նավթ, ներառյալ՝ կոնդենսատը։ Մեծ մասը՝ 22,1 մլն տոննան, Ազերի-Չիրագ-Գյունեշլի, իսկ մնացած 3,1 մլն տոննան՝ SOCAR-ի կողմից է։

Լրատվամիջոցը գրում է, որ նավթի արդյունահանման նվազումը, հատկապես, ազդեցիկ Ազերի-Չիրագ-Գյունեշլի բլոկից, անհանգստություն է առաջացնում Ադրբեջանի էներգետիկ ոլորտի վերաբերյալ: Դա ընդգծում է այն խնդիրները, որոնց բախվում է երկիրը, հատկապես, հիմնական մատակարարների արտադրության մակարդակը պահպանելու և նրա տնտեսության վրա հնարավոր ազդեցության հարցում՝ հաշվի առնելով Ադրբեջանում էներգետիկ ոլորտի նշանակալի դերը։

Էմմա Չոբանյան