Բաքուն չի ընդունում ՀՀ-ի «Խաղաղության խաչմերուկ» նախագիծը ու շարունակում արտատարածքային միջանցք պահանջել

Բաքուն ՀՀ-ի կողմից ներկայացված «Խաղաղության խաչմերուկ» նախագիծը չի ընդունում։ Այս մասին ադրբեջանական հեռուստաընկերություններին տված հարցազրույցում հայտարարել է Իլհամ Ալիևը։

«Կարծում եմ դա պարզապես PR ակցիա է։ Գիտեք, որ Հայաստանը չի իրականացնում  նոյեմբերի 10-ի եռակողմ հայտարարության մեկ դրույթը։ Դրա ամար էլ նրանք նման առաջարկ են ներկայացրել այդ փաստը կոծկելու ու միաժամանակ «Զանգեզուրի միջանցք» բառը ջնջելու համար։ «Զանգեզուրի միջանցք» արտահայտությունը նրանց շատ է նյարդայնացնում։ Իսկ երբ ասում եմ, որ միջանցքը կասկածի տակ չի դնում որևէ երկրի ինքնիշխանությունը, ի վերջո, կա Հյուսիս-Հարավ միջանցք, որն անցնում է Ադրբեջանի տարածքով։ Ի վերջո, կա «Արևելք-Արևմուտք» միջանցքը, բայց չգիտես ինչու Հայաստանում «միջանցք» բառը մի փոքր այլ վերաբերմունք է առաջացնում։ Ուստի՝ այն սկզբում կոչվել է «Հայկական խաչմերուկ», իսկ հետո՝«Խաղաղության խաչմերուկ»։ Բայց իրականում սա ոչ այլ ինչ է, քան PR արշավ»,-ասել է Ադրբեջանի նախագահը։

«Առաջին հերթին նրանք պետք է մեզ  անարգել անցում ապահովեն Զանգիլանի և Օրդուբադի միջև ընկած տարածքում։ Ես արդեն ասել եմ և ուզում եմ նորից ասել, որ Ադրբեջանից Ադրբեջան մեկնող բեռները, քաղաքացիները և տրանսպորտային միջոցները պետք է անցնեն ազատ՝ առանց որևէ ստուգման և մաքսային վարչարարության մեջ ներգրավվելու։ Ինչ վերաբերում է այլ երկրների բեռներին, օրինակ՝ Կենտրոնական Ասիայից Թուրքիա բեռներին Հայաստանի տարածքով, կամ նույնիսկ Ադրբեջանից Թուրքիա որոշ բեռներ, ապա, բնականաբար, բոլոր մաքսատուրքերը պետք է վճարվեն»,-ասել է Ադրբեջանի ղեկավարը՝ նշելով, որ Հայաստանի առաջարկած հաղորդակցման ուղիները Բաքվի համար ընդունելի չեն։

«Նրանց առաջարկած երթուղին՝ Ադրբեջանի հիմնական հատվածից դեպի Նախիջևան, անօգտագործելի է։ Այն անհնար կլինի օգտագործել ամբողջ տարվա ընթացքում, քանի որ այնտեղ եղանակային պայմաններն ու տեղանքը շատ դաժան են։ Ամենաճիշտ տարբերակը Մեղրիի տարածքով ճանապարհն է։ Դեռ խորհրդային տարիներին այնտեղից երկաթգիծ էր անցնում, մայրուղի էր կառուցվում։ Երկաթուղին և ճանապարհը նույնպես պետք է անցնեն այս ճանապարհով»,-ասել է Ալիևը՝ կրկին պնդելով, որ Ադրբեջանից Նախիջևան մարդիկ ու բեռները պետք է անցնեն առանց որևէ տեսակի ստուգման։

«Եթե ​​իմ նշած երթուղին չբացվի, ուրեմն մենք մտադիր չենք բացել Հայաստանի հետ սահմանը այլ վայրում»,-հայտարարել է նա։