Քաղաքականություն
08.01.2024 | 23:14
Լիբիայի նավթի ազգային կորպորացիան (ԱՕԿ) ֆորսմաժորային իրավիճակ է հայտարարել հունվարի 7-ից «Ալ-Շարարա» նավթային հանքավայրի լիակատար փակման պատճառով։ Ցուցարարների գործողությունների պատճառով դադարեցվել է նաև Զավիա նավահանգիստ վառելիքի մատակարարումը, փոխանցում է Կոմերսանտը։
«Նավթի ազգային կորպորացիան 2024 թվականի հունվարի 7-ից «Ալ-Շարարա» հանքավայրում հայտարարում է ֆորս մաժոր՝ ցուցարարների կողմից դրա արգելափակման հետևանքով»,- ասվում է հաղորդագրության մեջ։
Ամբողջությամբ դադարեցվել է նաեւ հանքավայրից Զավիա նավահանգիստ հում նավթի մատակարարումը։ «Աշ-Շարարա» հանքավայրում արտադրությունը կազմել է օրական 300 հազար բարել:
Երկրի հարավ-արևմուտքում գտնվող Ֆեզզան շրջանի բնակիչները հունվարի 2-ին գործադուլ են հայտարարել։ Տեղի բնակիչները պարբերաբար դժգոհում են վառելիքի մատակարարման ընդհատումներից, անբավարար զարգացած ենթակառուցվածքներից և մաքսանենգության աճից։ Ցուցարարները սպառնում են արգելափակել լիբիական մեկ այլ խոշոր նավթահանք՝ Ալ-Ֆիլը:
Ալ-Ֆիլը և Ալ-Շարարան Ալ-Ազվիայի ցուցարարների կողմից արգելափակվել էին նաև 2023 թվականի հուլիսի 13-ից մինչև հուլիսի 16-ը: Բողոքի պատճառը Տրիպոլիում իրենց ցեղակից, Ազգային համաձայնության կառավարությունում ֆինանսների նախկին նախարար Ֆարաջ Բումտարիի կալանավորումն էր։
