ՄԱԿ-ը Ռուսաստանին և Ուկրաինային անհապաղ դեէսկալացիայի կոչ է արել

ՄԱԿ-ի Մարդու իրավունքների հարցերով գերագույն հանձնակատար Ֆոլկեր Թյուրքը կոչ է արել Ռուսաստանին և Ուկրաինային անհապաղ քայլեր ձեռնարկել դեէսկալացիայի համար, ինչպես նաև ապահովել խաղաղ բնակչության պաշտպանությունը և հետևել միջազգային իրավունքի պահպանմանը։
«Ռազմական գործողությունների տագնապալի սրացում, տասնյակ խաղաղ բնակիչներ սպանվել են Ուկրաինայում և Ռուսաստանում: Միջազգային մարդասիրական իրավունքն արգելում է առանց տարբերակման հարձակումներն ու գրոհները քաղաքացիական օբյեկտների վրա», – X-ի իր միկրոբլոգում գրել է ՄԱԿ-ի Մարդու իրավունքների գերագույն հանձնակատարի գրասենյակը։
Այսօր ավելի վաղ, ըստ Բելգորոդի մարզի նահանգապետ Վյաչեսլավ Գլադկովի, Բելգորոդի հրետակոծության ժամանակ մի մարդ է զոհվել։ Եվս 11 մարդ վիրավորվել է։ Ինչպես նշում է ՌԴ ՊՆ-ն, մեկ օրում երեք հրթիռային հարված է հասցվել Բելգորոդին։
Մինչ այդ, դեկտեմբերի 29-ին ռուսական զորքերը մի քանի զանգվածային հարձակումներ են իրականացրել Կիևի և Ուկրաինայի այլ քաղաքների վրա՝ օգտագործելով տարբեր տեսակի հրթիռներ և անօդաչու թռչող սարքեր։
Ի պատասխան՝ ուկրաինական զորքերը դեկտեմբերի 30-ին հրթիռակոծել են Բելգորոդը, ինչի հետևանքով զոհվել է 24 մարդ, վիրավորվել՝ ավելի քան 100-ը։ Նույն օրը Ռուսաստանը գնդակոծել է Խարկովը։ Հարվածներից մեկը դիպել է «Խարկով Փալաս» հյուրանոցին, որտեղ այդ ժամանակ հյուրընկալվել էին գերմանական ZDF հեռուստաալիքի լրագրողները։ Անձնակազմի յոթ անդամներից երկուսը վիրավորվել են։