Քաղաքականություն
03.01.2024 | 20:18
Վերջերս Լեհաստանի արտաքին գործերի նախարար նշանակված Ռադոսլավ Սիկորսկին կոչ է արել Ուկրաինայի վրա ռուսական զանգվածային հարձակումներին պատասխանել Ուկրաինայի ԶՈՒ-ին հեռահար հրթիռներ մատակարարելով, գրում է BBC-ի ռուսական ծառայությունը։
«Մենք Ուկրաինայի ուղղությամբ ներկայիս զանգվածային հարձակումներին պետք է պատասխանենք Պուտինին հասկանալի լեզվով. խստացնենք պատժամիջոցները, որպեսզի նա չկարողանա նոր զենք արտադրել՝ օգտագործելով մաքսանենգ բաղադրիչներ, և Կիևին մատակարարել հեռահար հրթիռներ, որոնք թույլ կտան ոչնչացնել արձակման կայաններն ու հրամանատարական կենտրոնները»,- հայտարարել է Լեհաստանի ԱԳՆ ղեկավար Ռադոսլավ Սիկորսկին։
Պատերազմի սկզբում Արևմտյան երկրները հրաժարվում էին Կիևին մատակարարել հեռահար հրթիռներ, քանի որ մտավախություն ունեին, որ Ուկրաինայի ԶՈւ-ն հարվածներ կհասցնեն ՌԴ տարածքիցն և դա կհանգեցնի պատերազմի հետագա էսկալացիայի՝ ՆԱՏՕ-ի անդամ երկրների ներգրավմամբ։ Սակայն 2023 թվականի ընթացքում Ուկրաինան ստացել է Storm Shadow և ATACMS հրթիռներ Մեծ Բրիտանիայից, Ֆրանսիայից և ԱՄՆ-ից, որոնք հնարավորություն են տալիս հարվածել մոտ 300 կիլոմետր հեռավորության վրա գտնվող թիրախների։ Գերմանիան մինչ օրս հրաժարվում է ուկրաինական զինված ուժերին մատակարարել «Տավրուս» հրթիռներ, ինչի մասին Ուկրաինան երկար ժամանակ խնդրում էր։
Անցյալ տարեվերջին Լեհաստանում իշխանության եկավ «Քաղաքացիական պլատֆորմ» կուսակցության գլխավորած եվրոպամետ կոալիցիան, իսկ վարչապետ դարձավ Դոնալդ Տուսկը։ Լեհաստանի նախկին իշխանությունները նույնպես ակտիվորեն աջակցում էին Ուկրաինային ռուսական ագրեսիայի դեմ պայքարում. Վարշավան դարձել է Կիևի գլխավոր դոնորներից մեկը, բացի այդ Լեհաստանը մոտ մեկ միլիոն ուկրաինացի փախստականների ընդունել:
