15.09.2026 | 13:33
Վաշինգտոնում հայկական բրենդիի համտեսի երեկո է անցկացվել
Շվեդիան վերացրել է Թուրքիայի պաշտպանական արդյունաբերության նկատմամբ սահմանված էմբարգոն. Yeni şafak
Քաղաքականություն
27.12.2023 | 17:25
Շվեդիան, որը 2019 թվականի հոկտեմբերից Թուրքիայի դեմ էմբարգո է սահմանել պաշտպանական արդյունաբերության ոլորտում, 2022 թվականի սեպտեմբերին՝ ՆԱՏՕ-ին անդամակցելու գործընթացի մեկնարկից հետո սկսել է նահանջել այս որոշումից։ Այս մասին գրում է իշխանամետ Yeni şafak-ը։
Նշվում է, որ Շվեդիան, որը չեղյալ էր հայտարարել Թուրքիայի համար ռազմական արտադրանքի արտահանման բոլոր թույլտվությունները, կրկին սկսել է հաստատել այս ոլորտում արտահանման թույլտվությունները։ Այս մասին նախօրեին Թուրքիայի Ազգային մեծ ժողովում հայտարարել է ԱԳ փոխնախարար Բուրաք Աքչափարը ՆԱՏՕ-ին Շվեդիայի անդամակցության հարցով քվեարկության ժամանակ։
«Շվեդիան վերացրել է Թուրքիայի պաշտպանական արդյունաբերության արտադրանքի էմբարգոն։ Գործընթացի (ՆԱՏՕ-ին անդամակցության) սկսվելուց հետո թուրքական ընկերությունների կողմից ներկայացված հայտերը դրական եզրակացություն են ստացել»,- ասել է Թուրքիայի ԱԳ փոխնախարարը։
Հավելենք, որ Թուրքիայի Ազգային մեծ ժողովի արտաքին հարաբերությունների հանձնաժողովը նախօրեին ընդունել է ՆԱՏՕ-ին Շվեդիայի միանալու արձանագրության վավերացումը հաստատող օրինագիծը։
Էմմա Չոբանյան
