07.10.2026 | 15:00
Հայտարարվել են քիմիայի ոլորտում Նոբելյան մրցանակի դափնեկիրները
Բաքուն Ֆրանսիային կոչ է անում «Հայաստանին նոր պատերազմի չհրահրել՝ սպառազինություն մատակարարելով»
Քաղաքականություն
19.12.2023 | 18:14
Պաշտոնական Բաքուն հերթական անգամ դժգոհություն է հայտնել Հայաստանի և Ֆրանսիայի ռազմատեխնիկական համագործակցության կապակցությամբ։ Մասնավորապես, Ադրբեջանի ԱԳ փոխնախարար Էլնուր Մամեդովը կոլումբիական NTN24 հեռուստալիքին տված հարցազրույցում «Ֆրանսիային կոչ է արել Հայաստանին չհրահրել Հարավային Կովկասում նոր պատերազմի»։
«Այս տարվա սեպտեմբերին իրականացված «տեղական հակաահաբեկչական» միջոցառումներն ուղղված են եղել բացառապես անօրինական զինված անջատողական խմբավորումների դեմ»,- ասել է Մամեդովը՝ խոսելով սեպտեմբերի 19-ին Արցախի դեմ իրականացրած ռազմական ագրեսիայի և էթնիկ զտման մասին։
Նա նաև նշել է, թե «Հայաստանին պաշտպանական և հարձակողական զինատեսակներ մատակարարող Ֆրանսիայի գործողությունները չեն նպաստում հարավկովկասյան տարածաշրջանում խաղաղության հաստատմանը»։
«Ֆրանսիային կոչ ենք անում զերծ մնալ ապակառուցողական գործողություններից և չհրահրել Հայաստանին նոր պատերազմի»,- հայտարարել է Մամեդովը։
Հավելենք, որ Ադրբեջանը շարունակում է ժամանակակից սպառազինությունների ձեռքբերումը Թուրքիայից և Իսրայելից, ինչպես նաև նոր մատակարարների փնտրում՝ ի դեմս Իտալիայի ու Սերբիայի։ Վերջերս մամուլում հրապարակումներ եղան այն մասին, որ Սերբիան Ադրբեջանի հետ արդեն պայմանագիր է կնքել կամ առաջիկայում կնքելու է՝ 45 միավոր 155 մմ-ոց Nora-B52 հաուբիցների մատակարարման վերաբերյալ՝ ընդհանուր 311 մլն եվրո արժեքով։
Էմմա Չոբանյան
