Թուրքիայի ԱԳ նախարարը ԵՄ-ին կոչ է արել «ավելի արդար և սթափ դիրքորոշում որդեգրել Անկարայի նկատմամբ»

ԵՄ-ն պետք է ավելի սթափ դիրքորոշում որդեգրի Անկարայի նկատմամբ։ Այս մասին հայտարարել է Թուրքիայի ԱԳ նախարար Հաքան Ֆիդանը ընդլայնման և հարևանության քաղաքականության հարցերով եվրահանձնակատար Օլիվեր Վարհեիի հետ հեռախոսազրույցի ժամանակ, գրում է Անադոլու գործակալությունը։

Դիվանագիտական աղբյուրների հաղորդմամբ՝ զրույցի ընթացքում քննարկվել են դեկտեմբերի 12-ին կայացած ԵՄ Ընդհանուր գործերի խորհրդի նիստի արդյունքները, որը նվիրված է եղել Համագործակցության ընդլայնման հարցերին, ինչպես նաև դեկտեմբերի 14-15-ին կազմակերպված ԵՄ գագաթնաժողովի արդյունքները։

Ֆիդանն անընդունելի է անվանել այն փաստը, որ չնայած ակնկալիքներին՝ ԵՄ գագաթնաժողովում չի քննարկվել Եվրահանձնաժողովի ու արտաքին գործերի և անվտանգության քաղաքականության հարցերով ԵՄ բարձր ներկայացուցիչ Ժոզեպ Բորելի պատրաստած Համատեղ հայտարարությունը Թուրքիա-ԵՄ հարաբերությունների վերաբերյալ, իսկ փաստաթղթի քննարկումը հետաձգվել է մինչև հաջորդ գագաթնաժողովը։

Հաքան Ֆիդանը հայտարարել է, որ «ԵՄ-ն պետք է ավելի արդար և սթափ դիրքորոշում որդեգրի Անկարայի նկատմամբ»։

«Մի աշխարհում, որտեղ գլոբալ մարտահրավերները սրվում են, ԵՄ-ն պետք է բարելավի հարաբերությունները Թուրքիայի հետ»,- ասել է թուրք պաշտոնյան։

Նա նշել է, որ Անկարան ակնկալում է, որ ԵՄ-ն որքան հնարավոր է՝ շուտ կոնկրետ քայլեր կձեռնարկի այնպիսի հարցերի շուրջ, ինչպիսիք են Մաքսային միության թարմացումը, ներդրումների ոլորտում համագործակցության ընդլայնումը և Թուրքիայի հետ վիզային ռեժիմի պարզեցումը:

Էմմա Չոբանյան