16.01.2025 | 16:47
Սերժ Սարգսյանը, Ռոբերտ Քոչարյանը, Գուրգեն Արսենյանը Վաչագան Ղազարյանի գործով վկա են․ ՏԵՍԱՆՅՈՒԹ
Լևոն Խառատյանը տարբեր ցուցմունքներ է տալիս․ մանրամասներ 15 զինվորի կյանք խլած հրդեհի գործով դատական նիստից
Հասարակություն
15.12.2023 | 23:39
Գեղարքունիքի մարզի առաջին ատյանի ընդհանուր իրավասության դատարանում դեկտեմբերի 15-ին շարունակվել է 15 զինվորի կյանք խլած հրդեհի գործով քննությունը։ Զինվորական կացարանում հրդեհի բռնկման պատճառը, ըստ պաշտոնական վարկածի, եղել է բենզինի հետ վարվելու կանոնները խախտելը: Դատական նիստի ընթացքում մեղադրյալներ Գոռ Աղեկյանի, Եղիշե Հակոբյանի և Մառլեն Սարգսյանի կալանքի ժամկետը երկարաձգվել է երեք ամսով, շարունակել է ցուցմունք տալ պատահարին ներկա զինծառայող, տուժող Լևոն Խառատյանը։
Տուժող կողմը, սակայն, դժգոհ է գործի քննությունից։ Զինվորների ծնողները չեն հավատում պաշտոնական վարկածին, որի համաձայն գործով գլխավոր մեղադրյալ, կապիտան Եղիշե Հակոբյանը բենզին է լցրել վառարանի մեջ, ինչն էլ հրդեհի պատճառ է դարձել։ Պաշտպան Նորայր Նորիկյանը դատական նիստից հետո Factor.am-ին փոխանցեց, որ Լևոն Խառատյանի ցուցմունքը էապես տարբերվում է նախկինում իր իսկ տված ցուցմունքից։
«Մենք օգտվել ենք դատավարական իրավունքից` միջնորդել ենք, որ հրապարակվեն նախաքննական ցուցմունքները, ավելին` Լևոն Խառատյանի ցուցմունքը ոչ միայն հակասում է իր կողմից նախկինում տրված ցուցմունքներին, այլև՝ այլ անձանց տված ցուցմունքներին: Այն հարցերի պատասխանները, որոնք կարող են լույս սփռել գործի հանգամանքների վրա, Լևոն Խառատյանն ասում է, որ չի հիշում․ նրա ցուցմունքները խիստ անարժանահավատ են մեզ համար»,- մանրամասնեց Նորիկյանը։
Նախորդ դատական նիստերի ժամանակ հետազոտվել են գրավոր ապացույցները, և ցուցմունք է տվել տուժող Լևոն Խառատյանը։ Կայացած բոլոր նիստերն անցել են լարված մթնոլորտում։
Հաջորդ դատական նիստը, որի ժամանակ կշարունակվի Լևոն Խառատյանի հարցաքննությունը, տեղի կունենա 2024 թվականի հունվարի 26-ին:
Արփի Հակոբյան
