Նավալնին բանտից անհետացել է․ նրա ներկայացուցիչները չեն կարողանում կապ հաստատել ընդդիմադիր գործչի հետ

Երկուշաբթի օրը Ալեքսեյ Նավալնիի փաստաբանները հայտարարել են, որ կորցրել են կապը Ռուսաստանի ընդդիմության բանտարկված առաջնորդի հետ, որը, ինչպես ենթադրվում էր, գտնվում է Մոսկվայից մոտ 150 մղոն դեպի արևելք գտնվող ուղղիչ գաղութում։ CNN-ը գրում է, որ նրա գտնվելու վայրը հայտնի չէ:

Նավալնին 19 տարվա ազատազրկման էր դատապարտվել օգոստոսին․ դատարանը նրան մեղավոր էր ճանաչել ծայրահեղական համայնք ստեղծելու, ծայրահեղական գործունեությունը ֆինանսավորելու և բազմաթիվ այլ հանցագործությունների համար: Նա արդեն իսկ  ազատազրկման պատիժ էր կրում խիստ ռեժիմի գաղութում ՝ խարդախության և այլ մեղադրանքների համար, որոնք նա հերքում է:

Նավալնիի կողմնակիցները պնդում են, որ նրա ձերբակալությունն ու ազատազրկումը քաղաքական դրդապատճառներով՝ փորձ է լռեցնելու Ռուսաստանի նախագահ Վլադիմիր Պուտինի հասցեին նրա քննադատությունը:

Փաստաբանները մի քանի փորձ են կատարել մուտք գործել երկու ուղղիչ գաղութներ, որտեղ, ինչպես ենթադրվում էր, գտնվում է Նավալնին, որը լուրջ առողջական խնդիրներ ունի, հայտնել է նրա մամուլի քարտուղար Կիրա Յարմիշը: Ըստ նրա՝ Նավալնիի հետ  կապը կորած է արդեն վեց օր։

Սպիտակ տունը հայտարարել է, որ «խորապես մտահոգված է» Նավալնիի անհետացման մասին հաղորդագրություններով:

«Նա պետք է անհապաղ ազատ արձակվի։ Մենք պետք է պարզենք, թե ինչ է տեղի ունեցել: Նախ, նրան ընդհանրապես չպետք է բանտ նստեցնեին, և մենք պատրաստվում ենք աշխատել Մոսկվայում մեր դեսպանատան հետ՝ տեսնելու, թե որքան ավելին կարող ենք պարզել», – լրագրողներին ասել է ԱՄՆ ազգային անվտանգության խորհրդի ներկայացուցիչ Ջոն Քիրբին:

«Այն փաստը, որ մենք չենք կարող գտնել Ալեքսեյին, տագնապալի է, քանի որ անցյալ շաբաթ նա հիվանդացավ իր խցում. նրա գլուխը պտտվեց և պառկեց հատակին:  Գաղութի աշխատակիցներն անմիջապես վազեցին,  պառկեցրին Ալեքսեյին և  կաթիլային միացրին», –  պատմել է Նավալնիի ներկայացուցիչը։