Քաղաքականություն
08.12.2023 | 22:09
Ադրբեջանի փոխվարչապետ Շահին Մուստաֆաևը Մոսկվայում հանդիպել է ՌԴ առաջին փոխվարչապետ Անդրեյ Բելոուսովի հետ։ Ադրբեջանական լրատվամիջոցների հաղորդմամբ՝ կողմերը քննարկել են տրանսպորտի և լոգիստիկայի ոլորտում համագործակցության հեռանկարները, այդ թվում՝ Հյուսիս-Հարավ տրանսպորտային միջանցքի նախագծի իրականացմանը վերաբերող հարցեր։
Նշենք, որ Մուստաֆաևն ու Բելոուսովը Մոսկվայում հանդիպել էին նաև հոկտեմբերի վերջին՝ դարձյալ քննարկելով Հյուսիս-հարավ նախագծին վերաբերող հարցեր։ Հոկտեմբերի սկզբին էլ ՌԴ փոխվարչապետն էր այցով Ադրբեջանում։
Հիշեցնենք, որ այս տարվա մայիսին ՌԴ նախագահ Վլադիմիր Պուտինն ու Իրանի նախագահ Էբրահիմ Ռաիսին տեսակապով մասնակցել էին Ռեշտ-Աստարա երկաթուղու հատվածի կառուցման համաձայնագրի ստորագրման արարողությանը։ Նախագծում ներգրավված է երեք երկիր՝ ՌԴ-ն, Իրանն ու Ադրբեջանը։ Ուկրաինայում պատերազմի մեկնարկից ի վեր ՌԴ-ն մեծ ջանքեր է գործադրում երկաթգծի կառուցումն ու «Հյուսիս-Հարավ» միջանցքի այս ուղղությունը կյանքի կոչելու համար։ ՌԴ պաշտոնյաները տարբեր մակարդակներով պարբերաբար Ադրբեջանի իրենց գործընկերների հետ այս ճանապարհի հարցն են քննարկում։
Նոյեմբերին էլ Բելոուսովը հայտնել էր, որ Ռուսաստանն ու Ադրբեջանը պետք է համաձայնագիր ստորագրեն Ռեշտ-Աստարա երկաթուղային հատվածի կառուցման վերաբերյալ մինչև 2023 թվականի ավարտը։
«Մինչև տարեվերջ Ադրբեջանի հետ մենք պետք է նման պայմանագիր կնքենք։ 2028 թվականից էլ այս երթուղին ամբողջությամբ կգործարկվի բեռնափոխադրումների լրացուցիչ ավելացմամբ, սկզբի համար՝ տարեկան 15 մլն տոննա բեռով։ Սրանք դեռ բավականին հավակնոտ ծրագրեր են, բայց դրանք իրականացվում են»,- ասել էր Բելոուսովը՝ նշելով, որ քննարկվում է Հյուսիս-Հարավ տրանսպորտային միջանցքում եռակողմ միջազգային օպերատոր ստեղծելու գաղափարը։
Էմմա Չոբանյան
