23.02.2026 | 16:29
Արամ Հակոբյանը՝ շախմատի միջազգային մրցաշարի հաղթող
Ադրբեջանում կարմրուկի հետևանքով մարդկային կորուստների թիվն ավելանում է
Քաղաքականություն
07.12.2023 | 23:30
Ադրբեջանում կարմրուկի բռնկումն ուժգնանում է՝ ավելացնելով մահացածների թիվը։ Ադրբեջանական լրատվամիջոցների հաղորդմամբ՝ Գուսարում կարմրուկով վարակվել է 27 մարդ։ Գուսարի շրջանային հիվանդանոցի հասարակայնության հետ կապերի բաժնի աշխատակից Անժելա Զալովայի խոսքով՝ նրանցից 24-ը դպրոցականներ են։ Նշվում է, որ կանխարգելիչ միջոցառումներ են իրականացվում՝ կանխելու կարմրուկի տարածումը։
Նախօրեին էլ տեղեկություններ էին տարածվել, որ մանկատանը կարմրուկով վարակվել է 40 երեխա, որից 11-ը հիվանդանոցում է, իսկ Խաչմազի շրջանում վարակման 20 դեպք է գրանցվել։ Իշխանությունները, սակայն, չեն մեկնաբանում այս հաղորդումները և վարակման դեպքերի պաշտոնական թարմացված տվյալներ չեն ներկայացնում։
Ըստ Ադրբեջանի Առողջապահության նախարարության նոյեմբերի 29-ի տարածած տեղեկատվության՝ 2023 թվականի ապրիլից ի վեր բնակչության շրջանում գրանցվել են հիվանդության բռնկումներ։ Հիվանդությունը տարածված է հիմնականում երեխաների շրջանում։ Ապրիլից հանրապետությունում գրանցվել է կարմրուկով վարակման 284 դեպք, որից 35-ը՝ տարեցների շրջանում։
Կարմրուկի հետևանքով մահվան դեպքերը ևս ավելանում են․ վերջին երկու շաբաթվա ընթացքում արդեն հինգերորդ երեխան է մահացել։ Նեֆթչալայի շրջանի Աշագի Սուրրա գյուղում հիվանդանոց տեղափոխվելու ճանապարհին 10-ամյա աղջիկ է մահացել՝ Սամիրա Ալիևան։ Հարազատների խոսքով՝ աղջիկը վարակվել է մեկ շաբաթ առաջ, փորձել են նրան բուժել տանը, սակայն երեխայի վիճակն աստիճանաբար վատացել է։
Նշվում է, որ Սամիրայի եղբայրը նույնպես որոշ ժամանակ առաջ վարակվել է կարմրուկով և ապաքինվել։ Փաստի առթիվ հետաքննություն է տարվում։
Հաղորդվում է նաև, որ հիվանդության տարածման պատճառով մի քանի դպրոցներում որոշ դասարաններ անցել են հեռավար ուսուցման։ Առողջապահության նախարարությունը քաղաքացիներին կոչ է անում մինչև 10 տարեկան երեխաներին պարտադիր պատվաստել կարմրուկի դեմ։
Factor TV-ն ավելի վաղ ևս անդրադարձել էր Ադրբեջանում կարմրուկից մահվան դեպքերին։
Էմմա Չոբանյան
