Ղազախստանում դատարանի որոշմամբ լուծարվել է Ուկրաինայում ռուսական ագրեսիայից տուժածների օգնության հիմնադրամը

Ղազախստանի Ատիրաուի շրջանի մասնագիտացված միջտարածաշրջանային տնտեսական դատարանը որոշել է լուծարել Glory of Ukraine բարեգործական հիմնադրամը, որն օգնում էր Ուկրաինայում ռուսական ագրեսիայից տուժածներին։ Այս մասին հայտնում է Ղազախստանի Մարդու իրավունքների միջազգային բյուրոն (KIBHR), փոխանցում է VOA-ն:

Դատարանը, ըստ KIBHR-ի, հիմնադրամի գրանցումն անվավեր ճանաչելու որոշումը կայացրել է նոյեմբերի սկզբին, սակայն դրա մասին հայտնի է դարձել միայն հիմա։

Հատկանշական է, որ Ատիրաուի շրջանի արդարադատության դեպարտամենտում «Փառք Ուկրաինային» հիմնադրամի գրանցման պահից անցել է ընդամենը 15 օր, մինչև դեպարտամենտը հայց է ներկայացրել գրանցումն անվավեր ճանաչելու և հիմնադրամի լուծարումը հարկադրելու համար, նշում են մարդու իրավունքների ակտիվիստները։

Հայցի պատճառը, ինչպես հետևում է դատարանի վճռից, եղել է այն, որ, ըստ Արդարադատության նախարարության, հիմնադրամի կանոնադրությունը «չի համապատասխանում Ղազախստանի օրենսդրության նորմերին», և որ այդ խախտումներն «անուղղելի են»։

Հիմնադրամի ղեկավար Տուրարբեկ Կուսաինովը KIBHR-ին տված մեկնաբանությունում ասել է, որ գոյության կարճ ժամանակահատվածում իր կազմակերպությունը հավաքել և հասցրել է 5 միլիոն տենգե (10,800 դոլար) մարդասիրական օգնություն ուղարկել Ուկրաինա։ Ըստ Կուսայնովի՝ Ռուսաստանում են Ղազախստանի իշխանություններին «հուշել» լուծարել հիմնադրամը։

Ներկայում Ղազախստանում գործում են մի քանի բարեգործական հիմնադրամներ և կամավորական կազմակերպություններ, որոնք օգնություն են ցուցաբերում Ուկրաինային։