Քաղաքականություն
04.12.2023 | 23:06
ՀՀ ԶՈՒ զինծառայողը մահացու վիրավորվել է Ադրբեջանի զինված ուժերի դիպուկահարի կողմից։ Ադրբեջանի կողմից խաղաղության ընկալումը փոքր-ինչ տարբերվում է խաղաղ գործընթացի մեր ընկալումից։ Այս մասին X-ի իր միկրոբլոգում գրել է ՀՀ հատուկ հանձնարարություններով դեսպան Էդմոն Մարուքյանը։
«Խաղաղ գործընթացում ներգրավված բոլոր միջազգային գործընկերները պետք է աներկբա դատապարտեն բանակցություններից խուսափելու և սահմանին նոր սպանություններ նախաձեռնելու Ադրբեջանի վերջին գործողությունները, ինչը խաթարում է ողջ խաղաղ գործընթացը»,- գրել է Մարուքյանը:
Հիշեցնենք՝ դեկտեմբերի 4-ին՝ ժամը 14։35-ի սահմաններում, Ադրբեջանի ԶՈՒ-ն կրակ է բացել Բարձրունու (Վայոց ձորի մարզ) հատվածում տեղակայված հայկական դիրքի ուղղությամբ, ինչի հետևանքով հրազենային մահացու վիրավորում է ստացել ՀՀ ՊՆ N զորամասի զինծառայող Գերասիմ Ավետիքի Առաքելյանը։
ՀՀ ԱԳՆ-ն խստորեն դատապարտել է ադրբեջանական կողմի՝ նոր էսկալացիա հրահրելու, խաղաղության գործընթացը ձգձգելու և այն փակուղի մտցնելու նպատակ ունեցող այս գործողությունները։
